Prome Minister mr. Evelyna Wever-Croes a habri siman ofreciendo un conferencia di prensa caminda el a trece dilanti, entre otro, e topico di Wever-Croes Norm. Esaki ta un ley cu ta regula e salario di director y ta un exigencia di Hulanda. Ta algo cu ta existi aya caba, mescos cu na St. Maarten. Sinembargo, manera ta di spera, su ehecucion no ta bay sin resistencia di parti di e funcionario y ehecutivonan cu lo mira nan salario baha.
E mandatario a habri su presentacion indicando cu e ta na conocemento di reunion cu compania semi estatal a yama cu empleado pa mustra potret di dje indicando cu ta su deseo pa kita di nan salario. P’esey el a sinti necesario pa bin dilanti reacciona y aclaria kico e regla aki ta y pakico ta bin cu ne.
“Nos a realisa na Aruba cu tabata tin cierto compania cu tabata paga nan director un schat di placa. Pueblo a indica cu esey no ta husto,” Premier Wever-Croes a bisa. E punto di salida ta e salario di e prome minister. E director di un compania semi-publico/estatal por gana te cu 130% di loke un prome minister ta cobra. Ora a calcula esaki, e ta yega na 261 mil florin pa aña.
Gobierno a pone riba un lista e salario di 12 compania/instituto semi publico. For di esey a ripara cu ta un so ta cay bou di e norma, mientras ta sigui subi te yena na un director cu ta cobra 694 mil florin pa aña. Esaki ta representa un salario di casi 58 mil pa luna. Pa e mandatario, esaki ta loke pueblo kier men cu mester pone ordo, paso tin tin compania cu por hustifica a base di riesgo, etc., pero otro cu si no por hustifica e salario halto asina di nan director.
Pa e relato completo, lesa TREMPAN
