Gobierno di Aruba ta anuncia cu frontera entre Venezuela y Aruba ta keda cera pa 6 siman mas. E ciere cu Venezuela ta wordo prolonga regularmente a base di un decreto desde 2019 momento cu Venezuela unilateralmente a cera frontera.
Prome Minister Evelyn Wever-Croes a duna di conoce cu Gobierno di Aruba a dicidi di prolonga ciere di frontera cu 6 siman mas pa motibo cu no ta kere cu ta prudente awo pa habri e fronteranan. Aruba ainda no a recupera di e efectonan hopi devastador di Covid 19. Hopi ciudadano no a yega na e nivel di nan entrada prome cu Covid. Esaki ta un motibo pa cua a dicidi di mantene e fronteranan cera mirando tambe cu den pasado, debi cu e fronteranan tabata habri, hopi Venezolano a drenta nos pais y no a bay mas.
Sinembargo, Gobierno di Aruba ta contemplando si pa habri e frontera maritimo pero bou condicionnan hopi estricto. Entre otro, por transporta solamente cierto material so for di Venezuela pa Aruba. Condicionnan cu lo wordo anuncia pa asina tanto autoridadnan Venezolano y Arubano por controla prome cu e barco sali y yega. Un barco cu viola e condicionnan aki, entre otro si trece producto cu no ta permiti of trece persona sin status legal na Aruba, ta prohibi pa drenta waf di Aruba.
Prome Minister a duna di conoce cu ya a negocia e condicionnan aki den pasado. Gobierno di Aruba ta purbando pa haya e Gobierno di Venezuela na mesa pa yega na e palabracionnan aki pa mira cu sikiera por yega na habri pa transporte maritimo. Di e manera aki por importa producto na prijs mas abou for di Venezuela bou di e condicionnan estricto.
Autoridad Venezolano, lamentablemente, prome minister a indica, no ta mustra mucho interes pa e topico aki. “Di parti di Aruba, nos lo sigui haci nos esfuerso maximo pa e apertura maritimo pa solamente importacion di productonan por bira posibel pa awo”.
Prome minister a indica cu den un fase mas adelanta, lo sigui evalua e momento oportuno pa habri frontera pa buelonan directo entre Aruba y Venezuela. Na e momentonan aki, por realisa buelo pa Venezuela via otro pais entre otro Panama, Republica Dominicana y Colombia. Tambe, den Reino Hulandes tin e exigencia di visa p’e ciudadanonan Venezolano drenta Aruba.
