Si papia di e regimen di edad cu tin awor aki, tin cu calcula esaki pa wak kico ta su efectonan. Pero esey no ta na ordo awor aki, segun director di SVb, Edwin Jacobs.
E regimen di edad e ta manera ta poni den ley. E aña e ta na 62 aña y otro aña e lo ta na 62 aña y mey.
Jacobs a splica tambe cu e situacion di Corsou, pa loke ta trata pensioennan cu nan ta duna na pensionadonan biba na Aruba, ta preocupante. Nan ta cortando principalmente riba pensioennan pafo di Corsou.
Tin caso den corte y lo sigui esakinan hopi di cerca pa wak con corte ta tuma decisionnan riba esaki. E no ta husto den bista di SVb.
Corsou su situacion, na momento cu nan a tuma e pasonan pa bay sanea, nan tabata mucho mas leu den un fondo di pensioen, no saludabel cu por ehempel, na Aruba.
Esey ta pone e ora cu nan a tuma medidanan mas drastico, nan a bay di un solo biaha di 60 pa 65 y tambe nan a introduci pa esnan te cu 58 aña, na momento di e cambio, nan a bin cu no por baha cu 60, pero nan ta corta nan pensioen.
Consecuencia tabata cu e personanan a sigui tuma nan pensioen y no tabata tin e efecto cu nan a spera riba nan cash flow.
Ultimo cu Jacobs a mira, e cuenta anual di SVb Corsou, por a mira cu gobierno di Corsou ta aportando 30 miyon pa nan paga AOV. E mesun sistema cu tin cu Aruba. E gobierno ta garantisa e fondo y si tin deficit e ora ta cubri’e. Mescos cu den AZV, gobierno di Aruba tin cu cubri, e aporte di gobierno na e fondo di AZV, por mira cu na Corsou, si mira e cuenta anual, gobierno di Corsou a aporta 30 miyon florin pa por paga pensioen. Na Aruba no ta e caso.
Si un dia yega cu no ta colecta suficiente prima for di economia, na e momento ey si, gobierno lo tin cu duna aporte na esaki. Na e momento aki, no ta proyecta, cu e lo yega asina leu den e proximo 10 añanan. Ta premira si cu na momento cu e edad yega su 65 aña, ta mira cu e gastonan lo aumenta mas hopi. Consecuencia cu si e economia no responde cu prima, lo yega na un deficit. E ora e reservanan lo bay responde.
Ta importante pa e coleccion di prima ta efectivo y eficiente, pa asina por crea reserva pa enfrenta retonan cu ta premira cu lo bay tin den e di dos mita di añanan 20, na momento cu edad yega na 65 y despues lo mira aumento den gastonan, caminda cu lo por tin un bon reserva pa por responde na esaki.
E recuperacion ta den bon caminda. SVb no ta na unda nan ta si. Nan no a yega na e nivel di reserva premira. Pero tin te 2024 pa por crea un bon reserva, cu tin cu responde e ora den e di dos mita di añanan 20.
Jacobs a splica cu e edad pa e aña aki ta 62 aña. Entrante 1 di Januari 2019, e lo ta na 62.5 aña y mey. 2020, ta 63 aña. 2021, ta 63.5 aña. 2022 ta 64 aña. 2023 ta 64.5 y mey. 2024 ta bira 65 aña. Esey ta e regimen actual den e ley.
