Funda na Maart 2007, 24ora.com awor ta cla pa dal su siguiente paso den cuadro di su plan di desaroyo. Ta uza e fecha di 1 di september, cu ta Dia di Prensa, pa anuncia cu un era nobo ta cuminsa awe. Headlines Group, cas editorial di 24ora.com ta anuncia cu lo enfoca mucho mas riba noticianan uzando video, cu varios programanan cortico di entrevistanan profundo y mas cobertura ainda.
A amplia e cantidad di colaboradornan pa por ofrece comunidad mas noticia ainda. Mas hende riba caya ta traduci den mas noticia y den mas tipo di noticia tambe.
Siendo e medio di comunicacion di mas grandi na Aruba, cu mas o menos 200 mil usuario diferente pa luna riba nos website, ta haci cu e responsabilidad pa informa mas ainda, sumamente necesario.
Pa awor, pabien na tur nos coleganan cu dia aden y dia afo ta cumpli cu e responsabilidad di informa nos comunidad, 24 ora pa dia y 7 dia pa siman. Aki noticia no ta para. Danki na nan famia, cu ta mustra comprension pa e trabou aki.
Feliz dia di Prensa y na nos usuarionan…..DANKI pa tin nos como Bo fuente # 1 di tur noticia.
