Presidente di Parlamento di Aruba mr. Edgard Vrolijk a baha pisa riba Hulanda durante e encuentro Tripartiet na Sint Maarten. A papia di Hulanda como abusado, pa loke el a haci cu Aruba riba e interes di castigo cobra riba prestamo.
Cu un retraso chikito, a causa di horcan Tammy, a inicia diamars mainta oficialmente na Sint Maarten e reunionnan Tripartiet den cual ta participa e islanan di Caribe. Dialuna anochi tabatin e parti social mientras cu diamars mainta trempan a habri e reunion cu un ceremonia oficial.
Na e ocasion aki a hiba palabra Charetti America-Francisca (Presidente di Parlamento di Corsou); Sidharth Bijlani (Presidente di Parlamento di Sint Maarten) y mr. Edgard Vrolijk (Presidente di Parlamento di Aruba).
Cada pais a participa cu un delegacion di mas o menos dies participante. Di Aruba a bay: Gerlien Croes, Marisol Tromp, Darlaine Guedez Erasmus , Hendrik Tevreden, Edgard Vrolijk, Ryçond Santos do Nascimento, Mervin Wyatt Ras, Shailiny Tromp, Setty Yarzagaray, y Misha Raymond. Miguel Mansur y Arthur Dowers a cancela na final pa motibonan personal.
Presidente di Parlamento di Aruba mr. Edgard Vrolijk a probecha di e reunion aki pa expresa su mal contento pa cu Hulanda. E ta relaciona cu e tema di prestamo, unda cu Hulanda no solamente a cobra un interes mas halto y a pesar cu Aruba semper a cumpli, a pone un factor di riesgo acerca. Algo cu e Parlamentario aki no a mira cu bon wowo.
E reunion aki ta uno importante p’e, segun el a bisa, den bista di loke a pasa y ta tumando luga ainda “rond di pago di un prestamo causa door di un pandemia mundial. Un prestamo cu tin su base den articulo 36 di Statuut di Reino.
El a trece dilanti cu niun di e tres islanan “hamas lo por a prepara nan mes pa un crisis mundial causa pa un pandemia”. A recorda tur e daño financiero cu el a causa, principalmente pa Aruba cu ta un isla cu ta depende totalmente di turismo. “El manda nos economia plat y tabatin un pueblo bibando bou insiguridad grandi, a haci apelacion riba articulo 36 di Statuut di Reino, cu ta papia di yuda y sostene otro den situacion di calamidad.”
A recorda con na 1953 Aruba a aplica articulo 36 pa yuda Hulanda den nan calamidad di mas grandi. “Sin pensa mes pa mara esaki na condicionnan of pagonan. Pero den nos situacion esaki no a ser aplica. Nos como pais a conoce Rijkswet cu a mara nos na man y pia bisando nos “take it tor leave it”. Esey tabata e actitud di Hulanda. Di e forma ey a trata nos den e trayectorio di mas dificil di pais Aruba.”
Lesa un relato amplio den TREMPAN.
