Directie Infrastructuur en Planning (DIP) a yega Parlamento di Aruba, pa bolbe atende un reunion cu e representantenan di pueblo. Ta obvio cu e presion di pueblo riba nan representantenan ta grandi, pa cual e presion ta pasa over na Gobierno cu na su turno ta pas’e pa e departamento mes. Cu e realidad aki riba mesa, a tende di e directiva cu tin hopi trabou tumando luga, pero cu e retonan ta hopi tambe.
E pregunta di e parlamentarionan na directiva di VIP ta: Kico ta e solucion cu lo beneficia e pueblo di Aruba? Marilynn Dirksen, den e funcion di director suplente di DIP, a splica e motibonan dicon e servicio no ta optimal. DIP ta traha segun e sistema ‘First In, First Out (FIFO)’. Mirando e retraso di miles di peticion cu tin, awo ta trahando riba e peticionnan di aña 2013. Lo mester haya un manera pa caba di traha riba e retrasonan mas lihe posibel.
Pa basta aña e falta di maneho y casonan penal/disciplinario a causa un falta di confiansa y miedo bou di e personal. “Personeelszorg” tambe ta laga hopi di desea. Un atraso grandi den promocion a causa varios caso den corte y malcontento cu a afecta productividad. Tambe, tin un “onderbezetting” grandi na DIP. Solamente 35% di e funcionnan ta ocupa.
Marilynn Dirksen y su team a presenta e plan cu nan ta trahando riba dje pa mehora e servicio na pueblo. Hunto cu e pregunta y sugerencia haci door di e parlamentarionan, a yega na entre otro e siguiente puntonan:
- Haci e proceso mas facil, transparente y digitalisa pa e clientenan (nobo) por ricibi un contesta dentro di algun luna.
- Busca un grupo di profesional pa traha riba e retrasonan.
- Departamento di Recurso Humano ta coopera bon pa drecha posicion huridico “rechtpositie” di e trahadonan. Esaki sigur lo yuda mehora nan motivacion y productividad.
Marilynn Dirksen a indica cu no por bisa ainda con largo e proceso di mehoracion lo dura, ta depende di e casonan andando, cooperacion di Departamento Recurso Humano (DRH) y di Ministerio di Infrastructura. Pa hopi tempo DIP a keda pega sin por a mira un adelanto.
Dirksen a agrega cu pe y su team D.I.P. ta significa ‘Diligently In Progress’. Esaki ta significa cu D.I.P. ta trahando cu precaucion riba mehoracion y reorganisacion di e departamento.
“Como parlamentario, ta importante cu mi por mira cu trabounan ta wordo haci pa mehora e servicio y cu esfuersonan ta wordo haci pa acelera e mehoracion mas tanto posibel. Sigur un bon reunion unda cu nos a ricibi informacion actualisa di e plan di DIP. Mi lo sigui follow up cu DIP y cu nos Minister di Infrastructura”, asina Parlamentario di e Fraccion di MEP, Alvin Molina, a termina bisando. Mester bisa cu no ta e prome biaha cu Molina ta critica e maneho di DIP y tampoco ta e prome biaha cu e ta yama e directiva den Parlamento pa duna cuenta. Sinembargo, e realidad ta si, cu ta Minister Evelyn Wever-Croes ta encarga cu e cartera di Infrastructura y como tal, ta politicamente responsabel pa e desaster den DIP.
