E voluntarionan trahando den e encuesta di Forsa Laboral, lo ta bishitando e adresnan tur dia, for di diadomingo te cu diasabra, for di 8’or di mainta te cu 8’or di anochi. Nan lo ta uniforma cu un tshirt cora cu e logo di Departamento di Labor riba dje. Tambe nan lo tin un badge pa por identifica nan mes. Nan lo tin un folder cu lo ta splicando mas detaya e motibonan pa loke ta e encuesta aki. En caso cu e encuestadornan yega na un adres y no topa hende, nan lo laga un carchi (herbezoekkaart), y lo laga nan informacion atras pa asina e personanan cu ta biba na e cas aki, pa nan por contact e encuestador y pa asina traha un cita na un momento cu ta cumbini e persona mes y asina yega na haya e informacion.
Privacidad
Segun Lejuez, Departamento di labor ta garantisa cu tur informacion cu haya, lo wordo procesa na un manera anonimo. Den caso cu lo publica cifra, e lo bay semper den forma agrega. E lo ta bay ta den cantidad, porcentahenan. Un ehempel lo bay ta cu ta bisa cu tin tanto hende trahando na Aruba, tanto hende desemplea. E ta bay ta semper den un forma agrega, na un modo cu ta garantisa privacidad di tur hende.
Por ultimo
Bo informacion lo contribui pa mehora e bista cu por tin riba e desaroyonan riba e mercado laboral na Aruba. Pesey Departamento di Labor ta informa cu e personanan cu lo wordo bishita, cu e informacion cu nan suministra, ta esencial. Lejuez ta gradici tur hende di antemano pa nan cooperacion. Si en caso cu nan mester mas informacion, por yama na Departamento di Labor, cu ta 5237720 y por puntra pa un persona di e afdeling di investigacion di mercado laboral di Aruba.
