A transporta e victima cu urgencia pa hospital pero lastimamente den ora laat di marduga, a ricibi informacion di Cuerpo Policial di Aruba cu e victima a fayece.
A haci maximo esfuerso pa salba su bida pero pa 1:36 am, dokter a constata morto di: Anthony A Carty, naci na Aruba di 31 aña di edad.
E asesinato aki a sosode den ora di marduga, alrededor di 1:21 am den e zona turistico na Palm Beach. Segun por a compronde, cu dilanti ex-Sand Bar lo a los tiro dirigi riba un hende homber. E bala a alcans’e y el a bay suela mesora. Na sitio tabata scucha diferente grito, entre nan e nomber “Juni.” Tabata grita: “Ban pa mi Juni, lanta Juni.”
No a dura mucho cu e team di aresto di Cuerpo Policial a detene un persona na Saliña relaciona cu e caso di tiramento. Den un Toyota Vitz a topa e sospechoso. E detencion no a bay facil mirando cu ora cu team di aresto a dun’e señal pa para, a ranca careda y purba di core pa nan. Su coremento no a dura largo. Den un transporte policial a transport’e pa warda di polis caminda lo present’e dilanti un subfiscal.
Un fin di siman cu hopi caso cu arma di candela, atraco y morto cu ta pone tur hende riba alerta. Na famia di e fayecido ta manda nos mas sincero palabra di condolencia.
