Diadomingo marduga alrededor di 1:21 am a sosode un caso di tiramento den e zona turistico na Palm Beach. Dilanti ex-Sand Bar a los tiro dirigi riba un hende homber. E bala a alcans’e y el a bay suela mesora. Cuanto tiro a cay, no ta conoci ainda. E echo ta si cu e victima ta den un situacion critico. Polis a cera henter e area pa cuminsa cu e proceso investigativo.
Testigo y camara di siguridad sigur lo yuda pa soluciona e caso aki. Basta sanger a keda atras riba asfalt. Na dado momento a pidi ambulance cu urgencia mirando e estado di e victima. Na sitio tabata scucha diferente grito, entre nan e nomber “Juni.” Tabata grita: “Ban pa mi Juni, lanta Juni.”
Un rato despues a pidi polis presenta cu urgencia na hospital mirando cu e situacion a cuminsa bira tenso. Slachtofferhulp tambe a presenta na hospital p’asina brinda sosten na famia mirando e seriedad di e caso. No a dura mucho cu e team di aresto di Cuerpo Policial a detene un persona na Saliña relaciona cu e caso di tiramento. Den un Toyota Vitz a topa e sospechoso. E detencion no a bay facil mirando cu ora cu team di aresto a dun’e señal pa para, a ranca careda y purba di core pa nan.
Su coremento no a dura largo. Den un transporte policial a transport’e pa warda di polis caminda lo present’e dilanti un subfiscal. E recherchenan di districto di Noord t’esunnan responsabel p’e parti investigacion.
No ta descarta mas detencion den e proximo ratonan nos dilanti. Locual tin cu remarca ta cu; e tiramento a sosode den pleno presencia di turista. E turistanan tabata basta spanta cu algo asina ta sosode riba e ‘One Happy Island.’
