Recientemente a tuma luga un reunion di introduccion entre e presidente saliente di Aruba Hospitality & Security Foundation (AHSF), Tisa LaSorte, e altocomisario interino di Cuerpo Policial Aruba, Irma Gordon y e presidente entrante di AHSF, Dylan Molina. E fundacion ta planea pa activa bek otro aña y asina colabora mas cu polis y companianan priva di siguridad pa garantisa y promove un area turistico mas sigur.
Jan van Nes y defunto Roland Peterson a funda Aruba Hospitality & Security Foundation na aña 2001 den nomber di AHATA, den colaboracion estrecho cu Cuerpo Policial di Aruba. E meta di e fundacion ta pa sostene esfuersonan cu ta mantene siguridad den zona turistico. E proyectonan di AH&SF ta financia pa Aruba Tourism Authority cu e fondonan genera di impuesto di acomodacion cu turista ta paga.
Mester menciona cu na principio e fondonan tabata bin di AHATA mes hunto cu demas patrocinadonan priva, manera Caribbean Mercantile Bank y BSL Laundry, entre otro. Cu cambio di maneho den Ministerio di Turismo, a inclui e subsidio aki den roomtax di hotelnan. Consecuentemente, awendia e fondo ta sali for di Aruba Tourism Authority directamente pa e fundacion. Compara cu antes, e subsidio awendia ta menos. Mester menciona cu aña pasa, door di efecto di pandemia, no tabatin subsidio, pero si lo start atrobe den presupuesto 2022.
Meta di e fundacion ta pa preveni, promove mas visibilidad y garantisa siguridad den nos zonanan turistico den colaboracion estrecho cu Cuerpo Policial Aruba y companianan priva di siguridad, entre otro. Pa e ultimo binti añanan, a haci donacionnan substancial na hopi ekipo, na organisa tayernan special di siguridad y varios otro eventonan mas.
Ainda Dylan Molina no a tuma e fundacion over ainda, pero lo sosode prome cu fin di aña ainda. Awor e presidente saliente ta den pleno proceso di traspasa e directiva pa esun nobo.
