Awe ta 45 aña di Papiamento etimologico

Awe 30 di october 2021, nos ta conmemora 45 aña di Papiamento etimologico, pues for di aña 1976. E tempo ey expresion di Betico Croes durante e reunion di conseho insular na aña 1976 tabata: “Ki orguyo y satisfaccion ta pa nos, awe nochi den e sala di Parlamento aki, pa nos por yega na determina ortografia di nos idioma. Manera den varios ocasion mi a bisa, amor pa bo patria, nace bo ta nace cu ne, amor pa bo idioma bernaculo y materna, bo ta nace y crece cu ne. Y determinando e ortografia pa bo idioma, bo ta duna un empuhe den desaroyo y elevacion di bo idioma”.

Mas leu e politico a sigui bisa cu “Y e pueblo cu no ta dispuesto pa profundisa su mes den e materia, pa yega na determinacion di ortografia di su idioma, no tin respet pa su mes. Pues, nos pueblo, cu un historia chikito cu pasonan acelera, no solamente ta trata y traha ariba e asunto constitucional, esta e libertad pa nos pueblo, independencia di nos pueblo, pero den tur aspectonan nos ta mira, cu nos pueblo ta elaborando pa dun’e su propio cara den mundo pafo.”

Aruba ta e unico isla den Caribe Hulandes cu a opta pa nos idioma ta etimologico, contrario na e dos otro islanan cu tambe ta papia papiamento. Nan, esta Corsou y Boneiro, a opta pa e papiamento fonologico. E diferencia cardinal den e dos formulanan ta cu etimologico bo ta skirbie manera bo a prest’e di otro idioma mientras cu fonologico bo ta skirbie segun bo ta papie. Un ehempel bibo ta gerente di un compania. Na Aruba nos ta skirbi “manager”, manera cu nos a prest’e di e idioma Ingles. Na Corsou sinembargo na ta skirbie “mènedjer”. Ambos bo ta yama mesun cos vocalmente pero cu un gran diferencia den ortografia!