For di cuminsamento di juli 2021 cu e variante Delta a haci su entrada na Aruba, rapidamente e variante aki a causa preocupacion ora el a plama causando un brote grandi di caso di COVID-19.
A categorisa e variante Delta como uno mas contagioso compara cu e otro variantenan y esaki por a experencia tambe na Aruba ora di haci comparacion cu e brotenan anterior di COVID-19.
Te cu dia 12 di september 2021, na Aruba tin un total di 70.105 (75%) asegurado di AZV riba 12 aña cu si a vacuna y 23.668 (25%) asegurado di AZV cu no a vacuna.
E informacion aki ta hopi importante pa analisa: di e 70.105 (75%) cu si a vacuna, ocho persona a fayece relaciona cu COVID; y di 23.668 (25%) cu no a vacuna, 39 persona a fayece for di cuminsamento di juli te cu dia 12 di september.
Si recapitula tur data for di 1 juli 2021 te cu 12 di september 2021, por conclui cu pa cada 10.000 cuidadano cu no a vacuna, 16 a fayece relaciona cu COVID-19; y pa cada 10.000 cuidadano cu si a vacuna, 1 persona a fayece relaciona cu COVID.
E analisis aki ta basa riba cifranan di asegurado di AZV. Motibo cu ta uza cifranan di AZV pa e analisis aki ta pa motibo cu e cifranan registra ta logra un analisis cu un resultado real y confiabel. E cifranan aki no ta inclui hende indocumenta of studiante di afo cu a vacuna of cu por vacuna ya cu aki no tin exactitud y e midimento lo bira un calculacion proyecta. Pa medio di analisis continuo, DVG ta sigui evalua y dirigi su maneho di vacunacion cu ta demostrando di ta hopi efectivo den scapa bida di e cuidadanonan na Aruba.
