Recientemente a tuma luga un forum politico na Instituto Pedagogico Arubano (IPA). Aki ta caminda cu studiante- y docentenan a organisa un forum caminda diesdos partido politico a participa. Nan no ta consider’e un debate, mas bien un momento pa ricibi mas hopi informacion posibel di e politiconan.
Marilyn Richardson ta directora general di IPA, el a conta cu e forum a conta cu tres tanda. E forum a bay den un ambiente diferente, den e di dos tanda a pone e politiconan sinta hunto na mesa p’asina bin cu ideanan mas factibel pa enseñansa. Tabatin tres grupo, cada grupo a hunga e rol di un coalicion.
Un di e gruponan a consisti di politiconan di partido POR, RED, HTC y CURPA. Di otro banda a haya MEP sinta hunto cu AVP, Accion 21 y UPP. Den e di tres tanda e politiconan tabatin e oportunidad liber pa hiba palabra. Locual a hacie un poco dificil tabata e cantidad di partido, pero toch e no tabata imposibel.
IMPORTANCIA di FORUM
E forum a fungi como un forma di formula bo opinion pa por kies e miho partido pa representa bo den un proximo gobernacion. Durante e forum, a puntra e politiconan kico nan lo haci pa IPA si nan yega na poder. Segun e directora, a ricibi varios palabra “bunita” for di e politiconan, di cual ta algo normal durante campaña electoral. Na final e directora general ta gradici e comision organisado pa organisa un forum di caliber pa e comunidad di Aruba.
