Despues di a keda varios siman encarcela, e comerciante Pieter Susebeek lo sali liber.
Susebeek ta sospechoso hunto cu varios otro den caso Avestruz. Ya caba a detene varios persona, entre nan Franklin F. Abath, Freddy Every, Leoncita Arends, Rebecca Richardson, Jeff Franken, Ninosca Nuñez, Gaby Werleman, Mary Hsing y Claudia Sevinger, kende nan tur ya a recobra nan libertad.
Fuera di Benny Sevinger, kende ta e sospechoso principal, Susebeek tambe tabata encarcela pa interogacion.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017.
