Diadomingo anochi alrededor di 7:30 pm polis a para un auto marca Kia modelo Rio numera TX-116 na altura di rotonde Bushiri. E taxista aki no ta un desconoci pa polis. E tabatin dos pasahero den auto, di cual por lo menos un di nan tabatin droga den su poder. Pa cuminsa, a detene e pasahero masculino pa droga.
No a dura mucho cu polis a detene e chauffeur mes, esta e taxista. E no tabatin un rijbewijs valido, cual ta prohibi pa stuur auto sin un rijbewijs valido. Parce e auto su documentonan tampoco ta na ordo, a takel e auto y a hib’e ward’i polis.
No ta prome biaha cu e taxista aki ta haya su mes den problema cu husticia. Ta spera cu pronto Departamento di Transporte Publico (DTP) cuminsa actua riba tipo di situacion nan asina.