E proyecto di e edificio di ImSan ta uno hopi costoso. Director di e instituto, dr. Joel Rajnherc, a splica cu e financiamento di ImSan por wak’e cu ta parti den varios diferente parti. Tabata tin un financiamento chikito di pasado. Esey a wordo incorpora den e financiamento nobo aki. Henter e proyecto, cu cubrimento di e financiamento bieu, ta sali aproximadamente 60 miyon florin. Esey ta parti den construccion, parti den ekipo medico nobo. Ta parti den training, ta parti riba e ampliacion di e personal. Tur esey ta factornan cu a tuma den estudio for di comienso caba. El a wordo financia door di banconan riba mercado di financiamento y ta paga esaki bek den diferente opcion.
Un ta e aparatonan medico, cu ta wordo paga bek mas lihe cu e construccion mes. E edificio ta keda eynan. No ta bay tin cu reemplase, pero e ekipo medico despues di tanto aña tin cu cambi’e y percura pa tin nobo.
Ta paga e ekipo medico aproximadamente den 10 aña y e resto ta aproximadamente 16 aña.
Servicio
ImSan ta bezig pa haci contacto, en particular cu e islanan ruman di Reino ta papia cu nan. Primariamente semper a bisa cu mester duna e tratamento na pueblo di Aruba mes. Sa cu tin un wachtlijst largo di tratamentonan di ciruhia, di wowo, di diagnostico di wowo. Pero na cierto momento ta kere cu hunto cu hospital, ImSan ta percura cu no tin un lista di espera mas den e tempo ey.
Tin cu wak pa e futuro caba tambe pa e momento cu no tin e lista di espera, kisas ta bay tin un sobrecapacidad. Ta spera cu esey ta e caso. Despues ta wak pa servicio di turismo medico. Door cu tin Baptis Healt of South Florida, cu ta yuda pa ImSan haya un acreditacion internacional reconoci, ta kere cu por duna e calidad di servicio cu ta wordo reconoci den mundo medico, cu por atrae pashent di exterior. Ta kere cu primariamente esey ta bay ta for di e paisnan den Reino, pero tambe ta mirando futuro cu pashent for di Merca of Europa lo kier bin Aruba pa haya nan tratamento y disfruta di tur e otro posibilidadnan cu nos isla ta brinda nan den un vakantie, por ehempel.
Competencia
Dr. Rajnherc no ta kere cu tin un competencia. Ta un complementacion mas tanto. ImSan ta añadi na e servicionan cu ta existi caba. Na Aruba no tin servicio di radioterapia. Pa bay pone radioterapia riba dos luga, ta locura, segun e medico. Un luga por facilmente, cu un bunker, un mashin, por trata mas of menos 400 pashent pa aña. Si tin 250 pashent di cancer na Aruba, ta un locura pa tin un di dos luga. Pa diversifica e conocemento tampoco no ta bon.
Dagbehandeling pa tratamentonan cortico, menos complica, tin tanto wachtlijst cu Aruba tin mester di ampliacion di e servicio eynan. ImSan no ta competi. Pashent ta haya e oportunidad di scoge si e ta biba p’ariba di brug, si e kier wordo trata p’ariba di brug. Pashentnan di p’abao di brug tambe ta mas cu bon bini. Ta e escogencia di e pashent. Nan ta haya e libertad pa scoge. Esey ta duna un tiki competencia, den e forma di servicio. Esey ta pa e pashent haya beneficio.
ImSan kier duna un empuhe pa mehora, no cu e ta malo, pero semper tin luga pa mehoracion di e servicionan medico cu ta brinda na Aruba. Kier e miho cu ta posibel pa nos pueblo mes.
