Dr. Horacio Oduber Hospital a cuminsa vacuna su mesun personal awe. A vacuna e prome shete empleado, cu ta traha den diferente departamento. P’e proximo tres dianan lo vacuna gran parti di e personal den cuido medico.
Jacco Vroegop, director di Dr. Horacio Oduber Hospital, a gradici Hulanda p’e vacunanan ricibi y pa a manda nan relativamente lihe. Den e ultimo lunanan a traha hunto y hopi empleado di hospital a traha oranan largo pa salba bida di otronan. Nan a logra scapa bida di hopi hende cu COVID, pero ta lamenta cu no por a scapa tur.
Ta spera cu e vacunacion aki por yuda nos pa bay bek na normalidad. Vroegop ta spera cu e vacuna aki lo trece e confiansa bek den otro, den cuido. Tambe p’e economia cu mester di dje y a custumbra cu ne, por bin bek.
Minister di Salud Publico, Deporte y Turismo, Dangui Oduber, a gradici tur empleado pa nan esfuerso haci p’e comunidad den e ultimo lunanan. Por a maneha COVID na un bon forma, danki na e empeño di e trahadonan y e bon trabou haci. A scapa hopi bida den e ultimo lunanan. Gobierno di Aruba ta contento cu esaki ta e prome grupo esencial di mas importante di comunidad cu ta bin na remarca y pa mantene continuidad den cuido na tur momento.
