Departamento di Salud y Gobierno a informa riba e cifranan relaciona cu COVID-19 pa e dia di awe. Ta nota cu mester tin un brote un caminda pasobra di 23 caso positivo ayera y 25 caso di antayera, cu diripiente awe a lanta cu 52 caso positivo den un solo dia! E ultimo biaha cu tabatin tanto caso positivo asina den un dia tabata 3 di februari, pues como dos siman pasa.
Pa awe tin un total di 292 caso activo. Mientrastanto cuidadanonan ta sigui test. Esaki ta tuma luga tanto na Aeropuerto, laboratorio di Hospital como esunnan priva. A efectua un tn total di 634 test. ‘Postivity rate’ entre nos residentenan ta 18%.
Casonan di persona recupra pa awe ta 21 persona. Pa locual ta trata casonan nobo tin cu bisa cu esaki ta na un total di 52 caso pa awe di cual 6 ta no-residente. E cifra di no-residente positivo ta encera esnan no-residente cu ta test na aeropuerto na nan yegada y na laboratorionan prome cu nan bandona Aruba.
Cifra di personanan cu a perdi nan bataya contra e virus tambe a drenta. Cantidad di fayecido relaciona cu Covid-19 ta 69. Hunto cu esaki tambe tin informacion di Hospital, cu tin un total di 14 persona interna di cual 4 ta den Cuido Intensivo y 10 riba unidad general di covid. Edad promedio di esnan ingresa pa extra cuido ta 63 aña.
