Dia 8 di juli awo Maikel Maduro, Gerald Oliver y Jonathan Ridderstap lo haya sa kico corte ta pensa di e rol cu cada uno a hunga den e asina yama “Vacuna Gate” (of Anglo cu t’e nomber cu Ministerio Publico a duna na e investigacion).
Ta acusa nan di pertenece na un organisacion criminal mirando cu hunto nan a traha pa otorga certificado falso di vacunacion y falsificacion di documento. Esaki mester a tuma luga na aña 2021, prome cu e fecha di 8 di september cu t’e momento cu DVG a entrega keho.
Maikel Maduro t’esun cu nan a acerca prome y el a busca ayudo di e otronan pa hinca nomber den e sistema, pa motibo e mes tabata geschors pa un investigacion. A haci e denuncia riba e fecha menciona, pero na november di aña 2021, pues algun luna despues, a gara Oliver ta yena nomber den e sistema di DVG, pero haciendo uzo di su celular. Esaki el a haci supuestamente pa motibo cu e hendenan cu a paga y no a haya nan certificado tabata menasa Maduro.
Pero e mes ta bisa cu el a haci Maduro, kende debe placa, un fabor. E unico cos cu el a haya tabata un treat di Wendy’s. Pero loke ta straño ta cu Maduro ta bisa cu el a comete e echo aki pasobra e situacion tabata dificil y e tabatin mester di placa. Pero ta Maduro mes a duna Oliver y su primo Jonathan Ridderstap 2 mil florin ora cu a manda nan cas. “El a duna nos e placa pasobra pa su motibo nos a keda sin trabou”, esaki Oliver a bisa, siendo cu prome el a menciona cu Maduro debe placa.
Maduro di su banda ta admiti cu el duna e dosnan placa, pasobra nan a haya problema. Esaki ta di placa cu el a spaar y no por a bisa si den dje tabatin placa cu el a haya pa registra e hendenan como persona cu a tuma vacuna.
Aunke cu Maikel Maduro ta insisti di ta papia berdad y cu ta maximo 9 hende a acerc’e, el a spanta asina hopi ora cu a bay pa detene cu el a destrui su celular cu un martiu.
Ministerio Publico si ta kere cu debidamente e hendenan a beneficia di e acto cu nan a comete. Aunke cu den corte nan ta papia di suma di 2000 florin of 5 hende cu cada un a hinca nan nomber den e computer, Ministerio Publico a cuminsa e procedura caba di ontneming pa e ganashi cu nan a haci.
E trio aki a falsifica certificado di vacuna pa gana placa, a haci mal uzo di nan di e contract cu nan a haya pa yuda durante e pandemia y e campaña di vacunacion. E certificado di DVG ta algo di reconocemento internacional y nan a pone un mancha riba e sistema di Aruba, creando duda.
Loke fiscal no ta compronde ta e motibo dicon e hendenan mester paga, si e vacunacion no tabata algo obligatorio na Aruba. A base di hurisprudencia a pidi pa Maikel Maduro y Gerald Oliver 18 luna di cual 12 luna ta condicional, 3 aña di prueba, 240 ora di trabou pa comunidad y boet di 2500 florin. Pa Jonathan Ridderstap, kende a haya cu un sakito di cocaina tambe, a pidi 22 luna di cual 18 luna ta condicional, y pe tambe a pidi trabou pa comunidad y boet. Na final fiscal a pidi hues pa despues di sentencia, si declara nan culpabel, duna ordo pa detene nan di biaha y hiba KIA.
