Tur bishitante, diadomingo di 24 di juni2018, a keda encanta cu e diferente presentacionnan, cu tanto musico di edad hoben te na grandi a presenta. Hopi cara conoci y tambe caranan nobo tabata presente e mainta aki.
E concierto a cuminsa cu un presentacion cu nos a pidi p’e basta tempo caba: un grupo di studiante: mucha y hoben a duna un tremendo presentacion riba fio bou direccion di nan maestro Hester Matthijsse, compaña pa piano y cello. Tur hende a keda impresiona; bo por a tende un feneta cay.
Otro presentacion di calidad cu tambe a impresiona tur hende tabata esun di Justin Peña, kende a pidi e organisadornan pa e por presenta e mainta aki como muestra di gradicimento na Fundacion Donny Laclé cu e ultimo tres añnan a yud’e paga su lesnan na Scol di Musica. Naturalmente su maestro Ryan Maduro, kende a compañ’e riba guitara ta hopi orguyoso cu Justin, aki algun siman, ta subi avion pa bay sigui su carera musical na conservatorio na Zwolle. E ta tambe un satisfaccion grandi pa e Fundacion, e organisadornan y e bishitantenan cu semper a contribui den e Caha de Glas y asina a yuda Justin
Scol di Musica a cera su presentacion cu Ivan Ponson riba piano y despues un ensemble , bou direccion di Johnny Croes, cu a demostra cu tin mas musico profesional na caminda. Un presentacion di nivel halto.
Den pausa e caha di glas a pasa rond y e bishitantenan a haci nan donacion. Masha danki na e gesto bunita aki.
Mariachi Lirios del Campo tambe a haci un cos, cu su presentacion cu a anima e hendenan: nan a forma coro cu e mariachi, cantando entre otro : “Las Mañanitas”, “En mi Viejo San Juan, “Dera Gay”. Mariachi Lirios del Campo ta bou direccion di Vicente Geerman, pa casi 55 aña sin stop. Vicente, ademas di ta canta, ta toca diferente instrument y uno cu e mes a traha y e ta yama DonBom, cu ta un synfonia di boca cu su amplifier.
Pa cera e concierto y pone e cherry riba e bolo di e mainta aki a toca turno na nada menos cu Rondalla, “Universo di Aruba”. Un bunita presentacion di 12 guitarista/cantante conoci, bou direccion di Frank Croes. Nan a toca musica romantico y crioyo cu a kishiki e pianan y te hasta baliamento tabatin.
Na final e MC a anuncia cu no tin concierto fin di juli. E siguiente concierto ta tuma luga dia 26 di augustus.
