Despues di a bataya den tremendo forma den e interliga na Aruba unda a hunga algun tremendo partido di baseball contra di tanto Center como South Senior League, e ora cero a yega pa e seleccion di Aruba North League kendenan lo mester bay saca acara di nos dushi isla den e campeonato Del Caribe di baseball cu e aña aki lo tuma lugar na Corsow.
E ekipo di North League a hunga un final di Interliga dramatico contra di Center League unda nan a perde e prome wega y despues a sa na bons bin gana e siguiente dos weganan pa asina titula campeon di Aruba.
Pa di tres aña consecutivo Aruba North League a gana e derecho di representa Aruba den e campeonato Del Caribe di baseball Senior. Aña pasa nos muchanan a bataya fuerte na St. Thomas mientras e aña aki nan lo mester demostra e miho di nan mes na nos isla ruma Corsow. Pasinan cu lo competi hunto cu Aruba lo ta Republica Dominicana, St Thomas, Puerto Rico, Corsow 1 y Corsow 2, Panama, Colombia, Islas Virgines, St. Maarten y Venezuela.
E ekipo maneha pa manager Roderick Simon lo mester bataya fuerte contra e mihonan den nos region pa asina purba gana e pasashi pa yega e World Series di Senior League cu lo tuma lugar na Bangor, Maine. Na 2010, Aruba representa e tempo ey pa NAS a logra e titulo mundial mientras su siguiente anja 2011 ta e ultimo biaha cu Aruba a yega e Serie Mundial di baseball Senior League na Bangor, Maine. Un palabra di exito na nos muchanan.
Stichting Sportsubsidie Aruba a yuda subsidia e biahe di e seleccion di Aruba North League Senior Division pa e campeonato di baseball Del Caribe cu lo tuma lugar na Corsow. Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.
