Awendia tur cos ta online, cual ta ofrece menos cupo di trabao, cosnan a bira online, digital, automatico hinca totalmente den man di ciencia y tecnologia, y cuidao lo yega e tempo cu cash por wordo elimina, y ora un pober pidi cen pa e por cumpra un pan, e no por wordo yuda pasobra hende no tin cash, y tin hende ta sinti nan mes hopi bon ora nan por contesta “ ami no ta cana cu cash, tur cos ta via mi carchi banco (Mateo 25 :34-43).
E sistema di internet no ta perfecto, tin hopi situacion den cual internet ta cay afo, y hasta den asunto di pago e servicio di internet por faya, si bo yama un hende via internet,bo mes sa cuanto interferencia bo por haya, y mundo completo sa cu e uzo grandi di internet ta pone cu e sistema di internet ta core peliger, y e menasa di Global Warming tin cientifico nan hopi preocupa. Pasobra henter mundo ta pega na un sistema ,cu tur dia ta crece, y cu hende ta perdiendo control riba dje. Laga nos keda alerta.
Pero tin un sistema cu tin siglo y siglo ta funciona igual y e no ta bay cambia, pasobra no ta man di hende a establece, pero ta man di Dios.
Dios no ta funciona via di un app, nos tur tin mesun derecho di acerca su trono pa medio di oracion.
Pasobra mundo kier demostra na hende cu si bo no tin internet bo no ta conta, pero e berdad ta si bo tin falta di Dios den bo Bida, bo bida ta core peliger, pasobra ora bo wowo cera bo no sa na unda bo ta bay pasobra internet no por yuda bo.
Pero ora bo tin Dios den bo bida ,bo sa cu bo tin bida eterna, y ora bo wowo cera bo ta den presencia di Dios.
Nos tur ta uza internet, pero internet no por reemplasa Dios den nos bida, pasobra salbacion, sanacion, y liberacion ta bini solamente di Cristo Hesus.
Pero hende dia pa dia ta resisti Dios, y sigui den maldad. Sconde tras di e cosnan moderno sin realisa cu Dios ta mesun Dios di ayera awe y pa semper. Dios no ta cambia.
Ta nos deber pa recorda tur hende locual Dios ta bisa den 2 Cronicanan capitulo 7 versiculo 14 +15 ta para skirbi lo siguiente: Si mi pueblo cu a wordo yama na mi nomber:
(A) Humilia nan mes;
(B) Haci oracion;
(C) Busca Mi cara;
(D) Bira for di nan mal caminda. E ora ey lo mi tende for di cielo y lo pordona nan pica y cura nan tera.
Ta esey ta e unico solucion berdadero pa nos cas, nos famia, y nos yiunan. Esaki ta e terapia berdadero, cu ta funciona pa tur hende, e no ta costa placa. E ta exigi pa nos humilia nos mes na Dios y ta obediente na su palabra. Asina nos lo mira cambio den nos pais y den nos hogar.
Hende kier soluciona hopi problema sin Dios, hende kier tin yiu decente y integro, pero nan no kier instrui nan yiu riba caminda di Dios.
Mal criansa di mucha ta yama mal spirito riba e mucha cual ta e spirito di desobediencia, y si no tin coreccion, lo tin preocupacion y dolor.
Dios no ta online, E ta den nos oracion, E ta den nos obediencia. E ta cerca nos.
Pastoor Marcel Balootje
