E fin di siman aki a cuminsa malo pa por lo menos un miembro di Cuerpo Policial Aruba, esta Leandro A. Donato. E ta un di e hefenan di e departamento di Team Narcotica cu ta persigui bendedonan chikito di droga riba caya. A pesar cu e unidad aki ta haciendo un tremendo trabou den kita droga for di caya y persigui e bendedonan, toch a resulta cu nan ta “take care” di nan saco bon tambe, door di posiblemente aplica “overtime” pa oranan cu nan no a traha.
Asina e polis aki a presenta un lista di como 350 ora di overtime pa su hefe firma. Esey ta mucho mas ora di trabou cu un polis ta traha normalmente, saliendo for di e punto di bista cu tur hende ta traha ocho ora pa dia. Y como cu e asunto ta sistematico, a opta pa start un investigacion interno pa por saca afo ta di ki forma y cu ayudo di cua hefe, e polis aki ta logra enrikese su mes asina cu placa di “overtime” cu e no a traha pasobra, simplemente bisa, humanamente e no ta posibel!
Locual a sosode cu ultimo biaha, el a opta pa yena mas o menos 460 ora di overtime, cu a pone cu e coleganan polis a rabia masha. Pero nan ta sinti cu Mando Policial a keda proteha e recherche aki y pio cu su hefe ta keda firma aprobacion pa e haya e oranan extra paga.
Pero el a kibra su propio record, ora cu Mando Policial a opta pa mand’e cas pa por investig’e. Un forma cuestionabel pasobra nos no conoce “manda polis cas”, sino mester suspende. Pero asina mes e polis aki a haya un sorto di vakantie obligarorio, cu tambe ta algo nobo. Pues, a opta e ora pa no prohibie di drenta ward’i polis sino djis a mand’e cas obligatoriamente. El a hinca den su cabes, pa siendo na cas sin traha, pa bolbe manda su lista di overtime aden! E ora si el a haci asina bisto cu e casi no por biba sin overtime, pa cual awo tin prueba concreto cu bo no por traha overtime na cas. A opta pa suspend’e di trabou y a prohibie di drenta tur warda di polis.
Mester menciona cu tin otro departamentonan di gobierno ta investigando overtime den Cuerpo Policial Aruba, pasobra ta consciente cu como polis ta traha mas overtime cu otro ambtenaarnan, pero esey no por traduci den abuso y ni den hortament’i ora. Cu e suspension aki, Mando Policial den cierto forma ta manda un mensahe cla y raspa tambe pa tur polis, pa corda cu e lema ta “Sirbi bo pais” y no “Yena bo cartera”.
E caso aki, den cierto forma, ta lamentabel toch pasobra e polis specifico aki tabata mustra di tin tur cualidad pa sigui crece. Di tal forma cu a hinc’e den un trayecto di “management” pa e sigui curso pa den futuro por ocupa un puesto mas prominente den e organisacion. Pero door di konkelmento cu overtime, el a haci su mesun caya “hot” y casi imposibel pa por sigui traha den un organisacion den cual integridad ta bin na prome luga.
