Diabierna mainta, gobierno di Aruba a haci un anuncio significativo riba e situacion di Rijkswet. Fraccion di AVP tabata basta critico encuanto esaki. Tanto drs. Mervin Wyatt-Ras, como ing. Mike de Meza y tambe mr. drs. Arthur Dowers, a duna nan opinion riba esaki.
Reaccio di Wyatt-Ras
Parlamentario drs. Mervin Wyatt-Ras a reacciona, bisando cu e por corda cu e tipo di acuerdonan aki no ta nobo, señalando cu desde 2020, despues di e impacto di COVID-19, ya a cuminsa cu combersacion cu Hulanda.
E ta critica e gobierno pa no a consulta cu gremio ni cu e pueblo prome cu a tuma decision unilateral y a sugeri cu e reciente acuerdo aki por ta un maniobra pa desvia e atencion di e situacion financiero critico di e pais. El a indica cu Aruba ta enfrenta problema economico grave, cu costo halto di aaw y coriente y tambe dificultad pa satisface e necesidadnan basico di e poblacion.
Critica n’e maneho di gobierno
Wyatt-Ras a subraya cu su partido, AVP, a mantene un posicion firme contra di e perdida di autonomia di Aruba. El a afirma cu si AVP yega na poder despues di e proximo eleccion, nan lo renegosha Hulanda pa converti e debe den inversion beneficioso p’e pais. E ta considera cu e actual gobierno ta uzando e acuerdo di e Rijkswet como un strategia pa gana voto, mientras cu e situacion economico y social berdadero di e pais, ta sigui ta desastroso.
Di un otro banda, ir. Mike de Meza a reafirma e intencion di su partido pa converti e debe di COVID-19 den un fondo di inversion pa infrastructura, educacion y husticia, entre otro sector. De Meza a menciona cu ya a existi e apetit positivo na Hulanda p’e proposicion aki y cu, cu un planificacion cultural adecua, Aruba por beneficia significativamente.
Parlamentario mr. drs. Arthur Dowers tabata hopi critico cu e gobierno actual, acusando nan di no sa loke nan ta haciendo y di causa un gran daño n’e pais. Dowers a recorda momento caminda cu e prome minister a flta respet na Parlamento y a tuma decision sin consulta, loke a resulta den un perdida di confiansa y problema serio financiero pa Aruba.
