Dia 22 di mei a tuma luga un reunion yama pa Minister Ursell Arends encuanto calor extremo na Aruba cu ta impacta adulto mayor como grupo vulnerabel. Entre e stakeholdernan presente tabata Directie Natuur en Milieu, Horacio Oduber Hospital Aruba, diferente cas di cuido, y Directie Ouderenzaken.
E meta principal di e reunion tabata pa cada stakeholder por trece nan preocupacion dilanti y propone e miho practicanan y adaptacionnan cu mester tuma luga pa yuda e adultonan mayor durante e periodonan di calor extremo.
Durante e reunion Departamento Meteorologico a duna un presentacion tocante kico un ola di calor ta nifica. Nan a splica cu Aruba lo experencia calor extremo te cu october y cu cada aña ta bay bira mas calor mundialmente. E casnan di cuido a conta nan experiencia di con nan ta trata di evita molester pa nan cliente, pero nan a reconoce cu e calor actual ta un reto grandi.
Na final di e reunion Minister Arends a invita tur stakeholder pa comparti nan experiencia y ideanan dentro di un siman di tempo, pa asina hunto por pensa creativamente pa busca manera di reduci gasto relaciona cu e aumento di calor. A base di e informacion comparti por sigui hiba discusion. Den cuadro di esaki a invita esnan presente pa bini bek pa un siguiente reunion den dos siman di tempo.
Minister Arendst a gradici tur stakeholder cu a forma parti di e reunion y ta spera cu e colaboracion aki lo contribui na e bienestardi adultonan mayor durante e periodonan di calor extremo.
“Ami ta sigur cu den colaboracion y compromiso di tur presente, nos lo por enfrenta e desafionan di calor extremo y haya resultado positivo pa nos adulto mayor,” MinisterArends a comenta finalisado e reunion.
