Tin trabaonan intensivo ta andando na Departamento di Impuesto, pa loke ta paketenan di loonbelasting y paketenan di BBO cu pronto lo bay sali.
Vocero di Departamento di Impuesto, Meverly Romano, a splica cu tur aña ta cuminsa prepara pa loke ta trata e formularionan di declaracion di Loonbelasting, BBO, toeristenheffing, Speelvergunninsrecht, BBV, BBVAM, tur e tipo di belastingnan aki, ta cuminsa haci e preparacionnan ya for di den Juli, Augustus caba. Tin un departamento completo cu ta prepara e data, e cantidad di clientenan cu lo mester haya e formularionan.
Por ehempel tin e afdeling communicatie, cu ta prepara e layout y e contenido di e formulario. Tin un otro afdeling cu ta percura pa pidi oferta na drukker pa por laga druk e formularionan corectamente. Tin diferente departamento na DIMP cu ta envolvi den henter e proceso, prome cu e cliente lo por yega na ricibi e declaracion den su man.
Na e momentonan aki a ricibi tur e formularionan. Ta bezig ta print e dato di e cliente riba e formulario. Mester corda, cu pa loke ta BBO, Loonbelasting, ta cada cliente tin cu ricibi 12 formulario pa e aña cu ta bin, esta pa 2019, cu ta un formulario pa cada luna di aña.
Asina ey ta haya cu por ehempel pa un pakete di loonbelasting, tin cu prepara e declaracionnan di Januari pa December. Tambe ta pone un formulario pa loke ta trata e verzamelloonstaat y tambe e verzamelstaat opgaf derden cual ta inclui den e pakete di loonbelasting. Esun di BBO ta contene tur e diesdos formularionan di declaracio cu e cliente tin cu ricibi. Aki djis aña ta cambia y Januari caba, no mas laat cu dia 15 di Februari mester haci declaracion di Loonbelasting, BBO y haci e pago coresponiente.
Tur e formularionan aki mester yega den man di e cliente den transcurso di December/Januari. E ta un cantidad considerabel. Ta sacando mas of menos 11 mil pakete di BBO, un 8 mil mas of menos di Loonbelasting. E ta un trabao hopi intensivo cu ta tumando luga. Tin un team special cu ta trahando riba e cantidad, prepara tur e paketenan un pa un. Ta pone nan den secuencia den caha, caminda cu despues ta yama servicio di post pa busca nan. Y asina nan ta wordo parti.
E ta un trabao cu ta cuminsa na mita di e aña caba, prome cu e declaracion, e pakete aki yega den man di e cliente. E ta basta intensivo y ta spera cu pa otro aña por elimina e trabao aki, pasobra ta premira cu pa otro aña por bay completamente digital, cu e clientenan por cuminsa haci nan declaracion online.
Pero pa awor aki mester atende cu e sistema tradicional y esey ta bayendo bon. Ta na ora, segun Romano. Ta trahando pa saca e paketenan aki despues di dia 7 di December.
Esaki ta pasobra tin tambe un grupo di cliente, cual ta un grupo special, cual ta e conseheronan fiscal, of administracion of accounting, caminda nan tin nan lista di cliente y nan ta bin busca nan pakete pa nan clientenan.
Pa e grupo meta aki tin un servicio special caminda cu ta pidi nan pa manda DIMP nan lista di cliente. Nan ta manda esey via mail y nan ta manda tambe hunto cu un excell file full e lista, conteniendo e dato di nan cliente. Ta prepara tur e paketenan di acuerdo cu e lista cu nan ta manda y despues, ora cu ta cla cu e pakete, ta avisa e consehero, ki dia e por pasa busca su pakete pa su clientenan.
Esey ta un servicio special cu ta duna y e fecha final pa entrega e lista di cliente ta dia 7 di December. Lamentablemente despues di dia 7 di December, no por acepta mas lista nobo, pasobra e ora ey ya caba ta cuminsa cu e preparacionnan pa manda e pakete pa e clientenan via post.
Pesey tambe kier pidi tur cliente, e conseheronan pa sigui DIMP su comunicadonan, sigui mensahenan riba Facebook, pa asina nan ta na altura di tur e desaroyonan cu ta bay bin den e proximo dianan.
Esey ta algo hopi importante, contal cu e cliente a ricibi su pakete di loonbelasting y di BBO na tempo, di forma cu ora cu Januari caba, e por haci su declaracion sin tin mester di bin na DIMP, pa yama, pa pidi duplicado, pasobra e no a ricibi su pakete, etc. E servicio pa e cliente ta tuma como meta principal, pa por brinda miho servicio na e cliente, di forma cu e tin menos frustracion den henter e proceso aki, Romano a splica.
