Ya caba nos ta practicamente den porta di December y ya diferente preparacion a wordo haci, tanto riba e permisonan cu mester tabata tin pa importacion. Tambe preparacion pa locual ta Wela, pa cuminsa pone e containernan eyriba y haci e trabaonan necesario. Awor aki ta en espera di e containernan pa yega, segun experto den explosivo, Rubin Ponson.
Tin entendi cu e containernan lo ta biniendo den dos diferente cargacion. Un di nan probablemente lo bay ta yegando y tin entendi tambe cu tin un otro cu ta bay yegando un tiki mas laat. No sa e fecha exacto ainda, pero tin cu bay wak con ta bay handle cu esaki na momento cu bay yega.
Retraso
Segun Ponson, no a tende kico ta e motibo exactamente. Manera tur aña, tur aña tin algo cu containernan tabata yega laat y ta haci pa e departamentonan cu mester controla e situacion tiki fastioso.
Tin diferente regla cu mester cumpli cun’e, reglanan di siguridad cu ta haci cu no por habri tanto container asina riba un dia y mas laat nan yega, e dianan no ta bay yega pa por cumpli pa saca tur e containernan na Wela, dia 27 di December.
Dicon ta controla
Control ta bay riba diferente cos. Na momento cu habri e containernan, ta bay cuminsa controla kico ta wordo importa, Douane ta haci su trabao pa controla e containernan, si tur cos ta cumpli segun e documentonan.
Tambe e otro departamentonan ta controla si e klapchinan ta cumpli cu tur e reglanan cu mester cumpli cun’e di zonido, di largura di mecha etc. pa siguridad y prome cu e sali riba caya pa bende.
Un control tin cu tuma luga riba esakinan. E departamentonan cu tin pa haci esakinan, mester wak con ta schedule nan den otro pa por logra haci tur e containernan.
Tin cu bisa si cu e containernan e aña aki, te cu awor aki, locual cu a pidi p’e, ta mas cu ultimo añanan.
Sorpresa durante control
Ponson a indica cu ultimo añanan e ta bayendo relativamente bon, pero semper tin foutnan cu ta wordo haci sea ora di load e containernan aki, of na China mes. Ora e yega kisas ta mustra cu e klapchinan no ta cumpli cu e reglanan cu tin y tin cu tuma accion riba dje e ora. Pero por lo general esaki ta minimo.
No tin cambio
Pa loke ta maneho di klapchi, Ponson a comenta cu manera custumber, na cuminsamento di aña, e comision ta sinta hunto, ta manda un conseho pa minister y pa e tuma e decision e ora ey di e cambio desea. Ta mira durante e temporada kico a bay bon of menos bon y pa purba drecha esakinan pa tur aña ahusta esakinan, haci’e miho. Pero pa e aña aki mester bisa cu no lo bay tin ningun cambio. Lo ta mescos cu e aña anterior.
Tin algun cos cu a propone, pero segun Ponson, ainda nan no ta cla pa por bay ehecuta e reglanan aki. E no ta den e maneho ainda.
E miho maneho
Eliminacion di klapchi no ta den mente. Segun Ponson, ta wak esaki ainda como un tradicion of un custumber caba di nos comunidad y hopi di nos ta haya falta di sigur e tiramento di klapchi fin di aña, e pagara, e vuurwerk cu ta bay halto. Pero si ta purba di controla esaki, balans’e pasobra tin diferente grupo den comunidad, cu tin cu no gusta, tin cu gusta masha hopi y mester yega na un balansa na esaki, pa wak pa tur sali satisfecho for di dje.
Esunnan cu gusta por tin nan klapchi pa tira, sigur pa fin di aña, pero na un modo mas rasonabel.
