Dialuna awo: Partijraad di AVP lo dicidi si Benny Sevinger por keda parlamentario

Lider di Partido AVP, mr. Mike Eman, a anuncia diabierna atardi dilanti Cas di Partido AVP cu dialuna awo lo dicidi si Benny Sevinger lo keda of si e mester tuma su retiro como parlamentario. Den e sentencia di hues di diabierna, ta obliga Sevinger di tuma retiro di Parlamento di Aruba y keda sin participa na eleccion ni tuma ningun funcion publico durante cinco aña largo. Pero, su abogado a anuncia di diabierna caba cu nan lo apela e sentencia di hues prof. mr. Hans de Doelder.

E demanda y sentencia di Benny Sevinger

Ministerio Publico a cuminsa un caso algun aña pasa contra ex-Minister Benny Sevinger, acusand’e di a maluza su poder como minister pa beneficia su amigonan cu tereno, pa nan gana placa y cu e lo tin mas di dos miyon florin scondi riba un cuenta di banco den exterior. Pa esey a pidi cinco aña di prison p’e y dies aña for di politica y gobernacion. Hues sinembargo no ta mira e caso mescos cu fiscal y a libera Sevinger di tur acusacion pa su trabou como minister. Tambe a hala atencion di fiscal cu Ministerio Publico a pinta Sevinger manera un criminal y mafioso, sin tin prueba y sin cu por a prueba esey den corte tampoco. Pesey el a condena Sevinger solamente pa su fundacion, pues den su rol como politico y no como minister. A conden’e na un aña di prizon, di cual seis luna ta condicional (pues no mester sint’e) y tambe tres aña di prueba. Adicional, a baha e demanda di fiscal di dies aña for di politica te cu cinco aña for di politica y gobernacion.

A condena esunnan cu a haya tereno mas cu e minister

Si analisa e sentencia, ta bisto cu e coordinadornan di minister a haya “vrijspraak”, pues fiscal no a logra convence e hues cu nan tabata traha den forma corupto den e oficina di minister. Tambe no a condena e minister pa su trabou oficial di mandatario, pues no por a prueba cu el a yuda ningun hende. Pero, esunnan cu a haya tereno y a bende si no a core e mesun suerte ey. Nan tur a haya por lo menos dos aña di prizon, pa cual nan ta pensa di apela.

A condena esunnan cu a duna Benny regalo

Hues ta haya cu ta proba cu Curt Harms, Pieter Susebeek y Pristine Estates di Alfredo Lowenstein a duna e mandatario regalo. Y cu esaki a sosode net na momento cu nan tabata pendiente un tereno for di gobierno y nan a haya dicho terenonan. Corte ta haya cu e echo aki por crea e impresion cu Benny Sevinger a fix nan tereno mas lihe pasobra el a haya algo for di nan, probablemente den forma di donacion na su fundacion. Hues a ripiti na varios ocasion cu Sevinger mester por tabata sa cu comerciantenan cu haci donacion grandi na bo fundacion politico, lo verwacht algo a cambio.

AVP ta den celebracion

E echo cu e partido politico a “celebra” e sentencia di diabierna atardi no a cay den mucho bon tera den comunidad. Ta parce comosifuera cu cinco aña tabata hopi pero castigo di un aña ta OK, of ta bon. E realidad ta cu Benny Sevinger awor ta un politico condena pa tuma placa den su fundacion politico y di a malgasta placa di su fundacion pa uzo personal. Cu e tin un bon chens den Corte di Apelacion, kisas. Pero pa celebra publicamente asina ta manda un señal robes di e partido pa su votadonan y pa comunidad engeneral. Ta depende ki delito bo comete of ki castigo bo haya, e ora ta aceptabel y nos por celebr’e tambe. 

Partijraad cayente

Ta anticipa cu e reunion di dialuna 7:30 pm na Cas di Partido lo bira cayente. Tin dos asunto cardinal riba mesa cu mester un solucion. E prome, cu liderazgo di partido no tin fin di regla pa caba, ta e discusion interno entre Mike de Meza y Gerlien Croes hunto cu Rycond Santos do Nascimento. A keda rek e discusion y core pa e solucion te cu constantemente e protagonistanan di e problema ta lansa mensahe pa otro den media of riba red social. Pero, prome cu henter e guera interno aki, for di eleccion 2021 caba e mesun Croes y Santos do Nascimento tabatin problema cu e idea pa wanta Benny Sevinger riba lista, siendo un sospechoso. E tempo ey Eman a logra calma e discusion door di pone Sevinger te na ultimo, como number 29 riba lista, pa cual el a saca su mes tambe den voto. Awo, despues di sentencia, a opta pa benta e decision den scochi di partijraad.

Ken ta miembro di partijraad?

Den partijraad ta haya candidatonan, activistanan, siguidonan di hopi aña y algun votado critico cu kier aporta na e partido politico. Siendo e partido politico di mas bieu di Aruba, tin un cantidad di ex-candidatonan tambe cu ta sigui aporta awendia via partijraad. Probablemente lo trece e punto aki den reunion y laga mayoria dicidi su Benny Sevinger por sigui como parlamentario y miembro di partido mientras e ta apela su caso of si mayoria ta haya cu e mester pidi retiro, distancia su mes di politica pa por bringa su caso den apelacion y si e sali victorioso, e por regresa sin problema.

Y si partijraad dicidi cu e por keda numa…

Den caso cu mayoria dicidi cu Sevinger por sigui normal den Parlamento di Aruba te ora e sentencia di hues bira definitivo, anto lo por spera problema cu e hala hoben. Tin un grupo cu no ta sinti bon cu Benny Sevinger ta keda den parlamento siendo un sospechoso di husticia y awo un acusado condena. E lo afecta integridad di e partido, pasobra un cos ta sospechoso y otro cos ta condena. Lo por spera politiconan cu ta dicidi e ora pa bandona partido, pa evita cu nan ta mancha nan mesun imagen door di keda den un partido asina. Di otro banda, tin opinionnan ta bisa cu Sevinger tabata sospechoso for di hopi aña caba y den eleccion 2021 su rol di sospechoso a lag’e cay den voto pero toch a keda un di e politiconan cu mas voto riba e lista berde, pues cu su votadonan a sosten’e den e lucha pa demostra su inocencia y net su mesun partido awor ta lag’e cay.