Dia tres di November proximo, lo bay tin un festival di Caha di Orgel. Segun Arthur Kelly, a acerca manager di Museo Historico, pa asina aki por organisa un festival di caha di orgel riba e plenchi den e forti.
El a sigui splica cu e festival di caha di orgel cu ta tumando luga bastante, sinembargo hopi hende no sa cu e ta tuma luga den kringnan di e mesun hendenan.
A tuma e iniciativa pa Aruba completo bin y duna e aporte, di e manera aki disfruta di un atardi cu 10 caha di orgel.
Fort Zoutman ta un di e edificionan di mas bieu na Aruba. Y riba e plenchi lo bay tin e cahanan di orgel di mas bieu na Aruba entre otro cahanan di 1905, ta bay tin caha di orgel di 1915 y cahanan nobo.
Combina cu esey, ta bay tin gaita di Mama Rosa, cu ta bay tey presente cu e ambiente di pasco. Tambe ta bay tin un festival di cuminda, unda cu por saborea tanto cumindanan navideño como platonan crioyo durante e atardi aki.
E organisacion di e festival aki a bay hopi bon. Museo Historico tin partnernan cu ta yuda pa haci tipo di eventonan aki posibel.
Na tur cu ta yuda, ta wordo gradici inmensamente. Esaki por ta ta prome biaha e ta wordo organisa, pero ta spera cu esaki lo sigui.Pa Museo Historico e ta hopi importante, mirando cu nan ta forma parti di Fundacion Museo Arubano. Nan tin tres museo bao di e fundacion aki. Pa nan tur ta hopi importante pa por salvaguardia loke ta di nos. Pa por comparti’e cu un publico hopi mas grandi di loke e ta wordo comparti awor aki y tambe pa traspas’e, vooral pa e muchanan.
Kier cuminsa cu nan for di hoben, pa inspira nan pa nan curiosidad lanta. Por mira cu hopi di nan ta curioso pa sa. Pa Museo Historico ta hopi importante.
Bishita di scol
Pa loke ta e Forti, mas di 300 mucha a bishita y sinti kico mas ta carpinteria. Den Juli y Augustus y tambe den e vakantie di october, a organisa un tayer, caminda cu e muchanan ta bin museo tempran mainta, tabata haya un tour di e museo.
Tur di nan sa cu e forti tin 220 aña bieu. Despues di esey, tur por a sinta pa carpinte pa e resto di dia. Chikitonan a traha boto miniatura y e otronan mas grandi a traha nan propio toolbox. Pa un rato nan a bay bek den tempo den un di e ofishinan bieu cu tabata tin na Aruba.
Entrada
No tin carchi. E lo bay ta simplemente un florin na entrada. Di e un florin aki por drenta paden, disfruta di e festival. Alabes festival di e museo, unda cu por haya tur informacion. E un florin aki ta pa coopera pa e fundacion por sigui cu nan trabao den comunidad, pa loke ta nos herencia cultural. Esaki ta algo mas simbolico. E invitacion ta bay na comunidad pa nan tey dia 3 di November, cuminsando for di 6’or di atardi pa 11’or di anochi den Fort Zoutman y duna e aporte aki tanto na e fundacion como tambe na e engrandecemento di nos cultura.
