Pa por yega na fiansa publico sostenibel, CAft ta conseha pa bini cu economisacion structural den e presupuesto. Den e proximo añanan e gastonan lo aumenta como consecuencia di aumento di interes y compensacionnan pa disponibilidad di Public-Private Partnerships (PPP). Pa por logra reduci e cota di debe, ta necesario pa yega na surplus riba presupuesto den e proximo añanan. Den e cuadro aki ta inevitabel pa reduci e gastonan di personal di forma structura.
Pa por yega na fiansa publico sostenibel, Aruba mester reduci su gastonan na un forma structura. E proyecto di presupuesto di 2019 ta cumpli cu e norma presupuestario anticipa di -0,5% pa 2019. Sinembargo den e añanan despues e norma ta subi yega +0,5% y 1%. Banda di esaki e gastonan di interes ta aumentando pa motibo cu e debe di Gobierno ta casi 90% di GDP y na nivel internacional e tasanan di interes ta subiendo. E compensacionnan pa disponibilidad pa e proyectonan di PPP tambe ta bay aumenta considerablemente den e añanan cu ta bini. Si e expectativa di entradanan mas halto y reduccion di gastonan di forma structura ta necesario.
Reduccion di gastonan di personal di Aruba ta un manera necesario pa por yuda hiba e pais mas dilanti. Den e proceso di scucha tur dos banda (hoor- en wederhoor) anteriormente den e aña aki, un di e tres recomendacionnan di CAft tabata pa reduci e gastonan di personal di manera structural. E Gobierno di Aruba a presenta un plan, a base di cua e gastonan di personal lo baha den 2018. Tambe pa e añanan 2019 y despues, e plan ta mustra reduccion di e gastonan di personal. CAft ta indica na Gobierno cu minimalmente e ambicionnan den e plan aki mester keda realisa. Ta necesario pa tuma medidanan structural. CAft cu interes a tuma nota di e proposito di e Gobierno pa reforma e sistema di impuesto, cual ta hopi anticua.
CAft ta enfatisa cu ta di gran importancia pa Gobierno di Aruba y conseho di Minister di Reino prome cu fin di e aña aki yega na un acuerdo tocante di e cuadro legal di supervision pa e periodo entrante 2019. Esaki ta rekeri pa CAft por duna un conseho riba e presupuesto aproba. Pa aña 2019 te ainda Aruba ta aplica un norma presupuestario di 0,5% di GDP y ta e porcentahe aki CAft a uza den su evaluacion di e proyecto di presupuesto. Banda di e conclusionnan ya menciona, CAft ta pidi pa traha tambe un cuadro di mas aña pa 2020 y 2021 y pa adapta e pronosticonan di impuesto den e proyecto di presupuesto conforme e loke por spera realisticamente a base di e realisacion di e aña aki.
Den e ultimo dianan aki CAft a bishita Aruba. E bishita aki tabata e prome di Hellen van der Wal y Henk Kamp como miembro di CAft. Hellen van der Wal ta miembro di CAft riba proposicion di Aruba y Henk Kamp riba proposicion di Hulanda. Tur dos a tuma asiento den CAft entrante 1 di augustus 2018, cu Raymond Gradus como Presidente.
Manera ta usual, durante e bishitanan di Colegio na Aruba, a hiba combersacion cu Gobernador, Minister di Finansa, Asuntonan Economico y Cultura, cu Conseho di Minister y e Comision di finansa, Asunto Economico y Organisacion Gubernamental di Parlamento. Tambe CAft a bishita Banco Central di Aruba.
