Un dama grandi a scapa pero a pasa den un susto grandi ora auto a subi rotonde y bolter. Tabata banda di 7or cu Polis a wordo manda cu urgencia den direccion di Rotonde Cumana direccion Dadelstraat.
E Corolla preto tabata bin di Santa Cruz. E señora chauffeur no a paga tino parce cu el a yega e rotonde. El a sigui straight subi rotonde y e auto a dal den barancanan grandi cu tin na e rotonde. Djey e auto a bay halto y dal den un tronkon di mata riba e rotonde.
Djey el a cay bek riba su dak pabou di e rotonde. No a dal otro auto. E dama a keda herida den auto. E auto a keda hopi destrui. Hendenan cu a mira a core baha pa yuda e señora.
A kibra glas di e auto pa logra sake. Un di esnan cu a kibra e glas a keda herida cu corta na dede. Paramediconan di ambulance a yega y haya e señora sinta sperando yudanza. A hibe den ambulance y controle completamente.
E hoben cu a yuda kibra glas a corta dede y paramediconan di ambulance a yude tambe pa asina lama e herida. Takelwagen a wordo pidi pa hala e auto. Algun familiar cu a wordo yama a core yega na e sitio. Nan tabata hopi spanta ora cu a yega mira e auto riba dak. Nan a core baha puntra kiko a pasa pero a topa cu nan mama simplemente pasando un proceso di control den ambulance.
