Ministerio Publico di Aruba a confirma cu ayera dialuna, recherchenan di Jeugd en Zeden Politie a detene un sospechoso mas, den e mesun caso di abuso sexual cu menor di edad cu a start diabierna ultimo. Ayera a detene e hoben Josue Gregorio Vivas Hernandez, di 23 aña di edad, naci na Venezuela. Ta sospecha cu e tambe tin di haber cu e mesun caso aki di violacion sexual, cu e mesun mucha muhe menor di edad.
No por a divulga asina ki rol cada un di e dis sospechosonan ta hunga den e caso, pero si a confirma cu ainda ta papia di un solo victima pero dos sospechoso. Nan dos lo tin cu responde preguntanan cu e recherchenan experiencia y entrena pa investiga casonan di abuso sexual cu mucha.
Entretanto Fiscal a prolonga detencion di e prome sospechoso, cu a drenta cel diabierna atardi y ayera dialuna a tende di Fiscal cu a prolonga su detencion cu 8 dia mas. E di dos sospechoso, esta Josue, awo desde ayera ta encarcela y ta den su prome ocho dianan di detencion tambe.
Tabata diabierna ultimo, dia 16 di juli, durante oranan trempan di mainta, cu polis a detene Franklin Priest di 36 aña di edad na su cas den Tarabana na Dakota. E ta un empleado publico trahando den Bureau Leerplicht. E tabata entrenado di varios ekipo di futbol. Awendia e ta encabesa e club di futbol Brazil Juniors.
Ley ta condena hombernan cu, a sabiendas di edad di nan “enamorada” cu toch ta opta pa tene relacion cu nan. Ta sospecha e dos hombernan aki di lo a viola y realisa actonan inmoral cu un menor di entre 12 pa 16 aña y tambe di realisa actonan inmoral cu un menor di 16 aña of mas, pero cu ainda no a cumpli 18 aña.
