Ministerio Publico y Cuerpo Policial Aruba (KPA) tin intencion di tene un accion di colecta arma di candela pa bringa posesion di arma di candela ilegal. Durante e periodo aki tur hende por entrega nan arma di candela na polis den forma anonimo y sin castigo.
E ultimo añanan, a base semanal polis ta topa cu arma di candela durante control di trafico of cualkier otro detencion. Ta duna un impresion cu arma ta drenta nos isla facil y ta accesibel na un forma rapido, barata y lihe. Ta remarcabel e uzo di arma di candela bou di nos hubentud. Si antes tabata resolve un disputa cu un pelea, awendia ta saca arma tira riba auto of hasta riba cas di hende.
E intencion di e accion aki lo no ta pa resolve caso, sino pa kita arma di candela for di caya. Desde comunidad ta sona basta tempo caba e grito pa tene un accion asina. E ultimo accion di colecta arma di candela anonimamente y sin castigo a tuma lugar na 2009. Bisando esaki, ta for di tempo di Minister Dowers a haci e ultimo accion. A sigui Minister Andin Bikker cu nunca a hacie y awo Minister Rocco Tjon lo ripitie atrobe.
Mester menciona cu e tipo di accionnan asina ta simbolico pasobra na 2009 ta masha poco arma a drenta aden. Echo ta cu ningun bandido ta presenta na ward’i polis pa entrega su arma. Esunnan cu ta bin, mayoria biaha, ta un mama di edad avansa cu ta bin trece un arma cu e yiu a sconde na su cas. Pero exitoso e accion aki no tabata si.
Mas informacion tocante e accion di colecta armanan di candela (unda y ki tempo) lo sigui pronto.
