Manera 24ora.com a informa di siman pasa den forma di primicia, Minister di Asuntonan Economico, Comunicacion y Desaroyo Sostenibel, mr. Geoffrey Wever, a caba di anuncia na pueblo di Aruba, cu desde mañan lo tin un aumento historico den tarifa di gasolin na Aruba. Pa prome biaha prijs di liter di gasolin lo surpasa tres florin.
E prijs di combustibel cu Minister Wever a anuncia entrante 8 di juni 2022:
- Gasoline unleaded-premium: 321,2 cen p/ltr. (+ 32,2 cen)
- Diesel LS : 290,3 cen p/ltr. (+1,3 cen)
- Kerosin : 277,6 cen p/ltr. (+2,0 cen)
- E prijsnan ta inclui BBO/BAZV/BAVP
Aruba lo paga mas di 3 florin pa liter di gasolin
Cu e realidad aki riba mesa, prijs di gasolin a surpasa 3 florin pa liter, pa prome biaha den historia di nos pais! Ya caba, debi na aumento di luna pasa, ta sosode awo, tambe pa prome biaha den historia, cu gasolin y diesel ta costa mesun hopi. Esey riba su mes ta ironico pasobra Gobierno di Aruba ta cobra extra na impuesto (nummerplaat) pa auto cu ta core riba diesel, precisamente pasobra nan tarifa ta mas abou cu gasolin.
Ainda por corda e situacion di april, ora cu e prijsnan a subi den forma historico. Gasolin unleaded-premium a subi cu 30 cen, diesel cu 45,7 cen y kerosin cu 43,9 cen. Luna pasa gasolin a baha cu 2 cen pero diesel y kerosin a subi pisa.
Con e sistema ta funciona
Cada dos diaranson di luna Departamento di Asuntonan Economico (DEACI) ta anuncia bahada of subida di prijs di gasolin. Departamento di Asuntonan Economico ta uza e sistema di calculacion di S&P Global Platts US Marketscan, cual ta promedio pa luna di locual ta benta di producto petrolero riba mercado internacional.
2022: Prijs a kibra record!
Desde luna pasa tin un record nobo den prijs mas halto di gasolin na Aruba. Di acuerdo cu cifranan pa e ultimo 22 añanan, e cifra mas halto cu a yega di paga un luna largo pa gasolin na Aruba tabata dia cu Minister Nilo Swaen (MEP) di Finansa y Asuntonan Economico, a anuncia aumento dia 9 di juli 2008. E tempo ey prijs di gasolin a subi te na 266.2 cen pa liter y diesel tabata 257.9 cen pa liter. Cu e prijs actual cu Minister Geoffrey Wever (Raiz) a anuncia pa luna di juni, esta 321,2 cen pa cada liter di gasolin, nos a surpasa e record cu 55 cen pa liter, estableciendo un record nobo den prijs di gasolin na Aruba.
