Durante un conferencia di prensa teni diahuebs den oranan di atardi, directiva di Aruba Trade & Industry Association (ATIA) a informa di nan proximo evento cu ta bay tuma luga.
Ta trata di nan evento corporativo anual y cual e biaha aki ta hiba e tema di “Developing our human capital”.
E evento aki ta tuma luga riba diabierna, 15 di november, di 7’or pa 11’or di anochi, na House of Mosaic. Ya caba aña pasa a organisa e evento eynan y a haya reaccionnan hopi positivo. Ticket ta obtenibel pa 100 dollar na oficina di ATIA ([email protected]) of via di nan Facebook.
Michelle de Groot, directora di ATIA, den e conferencia a bisa cu ATIA ta hopi contento di por anuncia e di 10 edicion di nan evento corporativo anual, cu ya caba ta uno bon conoci bou di e comunidad comercial. E evento aki ta brinda oportunidad na e participantenan pa scucha un orador (sea local of internacional) riba un tema actual. Pero tambe ta brinda oportunidad pa “networking” cu comerciantenan y otro personalidadnan prominente di sector priva of publico.
“Developing our human capital” ta e tema di e aña’ki. ATIA a bin ta scuchando for di su miembronan pa algun tempo caba con dificil ta pa haya personal den e mercado laboral, y ta papia aki di puestonan na tur nivel den un compania. Loke cu nan ta consciente di dje ta cu tin un desempleo di 7.3%, segun e ultimo cifranan disponibel cu ta data di november 2018. Bou di e hobennan e cifra di desempleo ta hasta 16.2%. Tin hende buscando trabou, pero loke tin na oferta riba mercado, no ta loke e companianan mester. Esaki ta nifica cu mester busca trahado for di afo, pero e ta nifica tambe, segun sra. De Groot, cu e ta un proceso basta largo y dificil. Consecuentemente hopi compania ta dicidi di sigui cu e personal mes cu nan tin of mester para nan crecemento.
Analisando e situacion, ATIA a dicidi pa invita como orador sra. Shea Gopaul, kende ta representante special di e organisacion internacional di doñonan di trabou na Nacionnan Uni. Loke ta hala atencion ta cu sra. Gopaul ta fundadora di Global Apprentinceship Network” (GAN). Su experticio riba e tereno aki ta bira hopi importante pa Aruba. GAN ta un organisacion cu ta conecta companianan y organisacionnan cu hobennan y cu “lifelong Learners” pa forma asina un conexion entre educacion y empleado (siñanando trahando). Na Aruba y otro partinan di mundo, e directora di ATIA a splica, ta existi loke nan ta yama “skills gap”, esta loke e hobennan ta siña y loke e mercado laboral tin necesidad p’e no ta cuadra. P’esey e formula di forma partnership entre companianan y scolnan di tur nivel por yuda accelera adkisicion di e habilidad y capacidad necesario den e mercado laboral y forma un “pool” di talentonan local cu ta cuadra cu e necesidad.
Ta hopi importante pa esnan cu ta forma parti di e mercado laboral caba sigui adkiri conocemento durante henter nan bida, participando den training, tayer of otro educacion (mas formal) pa crece den bo ramo. Educacion na trabou, cu a keda proba, ta hopi importante pa e trahadonan. Esey ta conta hopi ora cu nan dicidi pa cual compania nan ta bay traha. E oportunidad di educacion na trabou ta mantene nan motiva y ta aumenta e productividad tambe. “P’esey nos ta hopi contento di por trece Shea Gopaul pa papia riba e tema aki. Nos ta encurasha e comunidad comercial pa no warda te ultimo pa cumpra e ticket. A cuminsa cu e promocion e siman aki, y ya ta yegando na 50% di ticketnan bendi.”
CMB
E evento anual aki cu orador internacional tabata posibel cu cooperacion di CMB, cu un biaha mas a kere den e evento importante aki pa e comunidad comercial. Ilan Lopez, Public Relations & Marketing Officer di CMB, tabata presente na e conferencia di ATIA. A bisa cu e evento aki ta algo cu CMB tur aña ta patrocina, ya cu e ta un tema cu ta coherente cu e comunidad y cu ta di importancia pa pone luz riba dje. CMB ta kere semper den educacion continuo y ta algo cu nan ta promove internamente, pasobra e cuponan di trabou ta dinamico y ta keda cambia pa cual nan ta inverti den empleadonan cu kier sigui siña. E ta haci cu un negoshi ta bira sostenibel a largo plaso. Henter comunidad comercial ta invita pa participa na e evento aki.
