Mescos cu a sosode e prome biaha, dialuna awor atrobe Minister Otmar Oduber a instrui trahadonan di Serlimar pa organisa un otro manifestacion contra su mes. Lo bay Parlamento di Aruba pa entrega un manifiesto pa urgi Parlamento, specificamente e fraccionnan di MEP y RED, pa trata e cambionan den ley di Serlimar mas lihe posibel. Despues lo pasa Bestuurskantoor tambe pa ey tambe “presiona” Gobierno pa pasa e ley mas pronto posibel.
Hecho ta cu Minister Otmar Oduber no tin sosten politico pa pasa e ley aki. Ta dos biaha caba cu el a bay Parlamento cu e mesun intencion pero no a yega na votamento. Parce cu tin Parlamentarionan di MEP cu no ta sostene e cambio ni tampoco e fraccion di RED. E ultimo aki a contesta Oduber mescos cu POR y MEP a contest’e ora el a purba pasa su ley di Cannabis y pa independisa DPS School, esta cu e “timing” no ta corecto. El a bisa nan cu mientras no pasa e dos leynan di RED, no conta riba dje pa ningun di e leynan aki.
Durante e ultimo dianan a purba tur forma pa convence dos Parlamentario specifico pa haya nan bolter di nan posicion. A combersa pa oranan largo pa purba cambia nan “no” pa un “si”. Ora cu esey no a logra, a hasta menas pa bay Ministerio Publico contra un Parlamentario di MEP, pa motibo cu comercio lo a “cumpr’e”, un acusacion hopi serio!
Awor cu ta cla cu no tin sosten, mesora POR a laga publica un video den cual a edita contesta di Ricardo Croes, di Booshi Wever y di Ursell Arends riba dia di e debate di Camara di Comercio, den tempo di campaña electoral na 2017. Di e forma aki ta purba pa ataca Ricardo Croes politicamente, bisando cu e no ta cumpliendo cu locual e mes a priminti su votadonan den campaña.
Trahadonan di Serlimar a reacciona furioso pasobra e “coordinador” di Minister den Serlimar ta menasando y forsando trahadonan pa bay den accion dialuna y cu esun cu no cumpli lo no renoba nan contract. Hasta a cambia ruta y adapta orario pa recoge sushi na cas di hende pa por tin e trahadonan liber pa bay entrega manifiesto dialuna. Mayoria a bisa cu nan lo no bay, pasobra e cos a bira un wega caba y nan protesta lo no ta pa pasa e ley awor, sino pa POR purba midi forsa contra RED y MEP den Parlamento. E trahadonan a informa nan sindicato caba cu nan no ta den wega politico y cu ta sinti cu kier “uza” nan pa e Minister por logra su meta prome cu e baha como Mandatario.
