Ingenious Business Solutions ta un compania di Aruba cu aña pasa a dal e paso grandi pa habri hala y inaugura un oficina na Colombia. Como resultado, nan ta masha satisfecho cu e logronan te awo.
Aña pasa tabatin un mision comercial pa Colombia, unda cu IBS Aruba a participa tambe den dje. Husto e tempo ey, segun Derrell Maxwell di IBS Aruba / Colombia, a haya e conseho pa traha cu Holland House Colombia cu tin e conexionnan necesario pa duna nan e empuhe riba e mercado ey. “Mi tin cu bisa cu desde e momento ey tur cos a bay masha bon mes. Pa un empresa manera nos cu ta bini di Aruba y cu ta busca pa habri caminda, haya cliente, el a resulta masha bon mes.”
El a conta cu el a ricibi masha bon cooperacion di Holland House, cu tramitenan pa establece un empresa y busca cual ta e miho partner– of clientenan pa e ramo den cual nan ta opera. P’esey e ta recomenda cualkier empresario di Aruba cu kier sondea e posibilidadnan na Colombia, pa bira miembro di Holland House Colombia.
Maxwell ta sinti cu tin oportunidad pa tur hende pa loke ta e mercado Colombiano, cu ta un pais di 80 miyon hende. Sea bo ta un empresario cu kier importa producto for di Colombia pa Aruba of, manera ta su situacion, brinda un servicio di bo compania riba e mercado Colombia. E ultimo aki ta nifica cu mester establece un oficina eynan. Colombia ta ofrece productonan na bon prijs pa exportacion. Y pa haci negoshi, e por bisa cu e ta un tremendo mercado, hopi grandi mes. “E oportunidad ta grandi pa cualkier negoshi cu bin establece aki.”
Riba mercado internacional nan specialisacion ta “professional displays”. Esaki ta pantayanan grandi cu ta ilustra un mensahe (propaganda). Den mercado Caribense, nan ta lider riba e tereno aki. Tambe a introduci e sistema di payment kiosk, manera cu e inbtroduci recientemente na Aruba.
Na final el a bisa cu acerca Holland House Colombia ta e stap cu cualkier empresario mester dal ora cu e yega Colombia.
