Diasabra 16 di maart 2024, studiantenan di Instituto Pedagogico Arubano (IPA) a uni forsa pa planta nan hardin di alimentacion den cuadro di e proyecto di agroforesteria. E dia aki ta coincidi cu Aruba Doet, un recordatorio poderoso di e forsa di comunidad y e importancia di esfuerso colectivo pa e bienestar di nos isla.
E inclusion di Instituto Pedagogico Arubano (IPA) den e proyecto di agroforesteria ta un paso adelante den formacion di nos futuro docentenan. Ta ofrece nan e hermentnan necesario pa duna les tocante agricultura sostenibel y siguridad di alimentacion, inspirando asina e siguiente generacion cu e importancia di cuida nos medio ambiente y provee pa nos mes.
Preparacion pa e plantamento a inclui un presentacion tocante e practica di agroforesteria, dunando studiantenan y docentenan un bista profundo riba e beneficionan y mantencion di e hardin di alimentacion, y e meta final di e proyecto. E participacion di varios maestronan ta subraya e compromiso di IPA cu educacion integral y aplicabel na bida real.
Segun Minister Ursell Arends, encarga cu Sector Primario, “E iniciativa di introduci agroforesteria den nos scolnan ta un paso grandi pa incorpora practicanan di agricultura sostenibel den e educacion di nos hobennan. Cada inversion den nos docentenan ta un inversion directo den e futuro di nos isla, y mas importante, den e futuro di nos muchanan.”
E fruto di e proyecto ya ta visibel den e dedicacion di e comunidad escolar, e esfuerso incansabel di boluntarionan, y e apoyo di partners di proyecto, esta Santa Rosa y Living Soil. Un palabra di gradicimento ta bay na maestronan di IPA, esta Jantine de Groot, Gregory Goedgedrag y Marilyn Richardson.
Huntu nos ta sembrando simia pa un futuro unda cada hoben tin e conocemento y pasion pa mantene nos siguridad di alimentacion. E hardin di alimentacion na IPA no ta simplemente un proyecto; e ta un simbolo di speransa, innovacion y un compromiso pa un Aruba mas autosuficiente.
