Pa algun tempo caba por a observa con e partido mas grandi den gobierno, esta partido MEP ta trapa riba su partner den coalicion, esta partido RAIZ.
Ta parce cual cu partido RAIZ no tin nada di bisa den e gobierno aki mas. Partido RAIZ ta riba e banda AM di radio. Un banda cu ningun hende ta scucha. Voz di Aruba masha tempo a cera riba e banda AM y nos ta kere cu RAIZ masha tempo no tin sintonia mas. Bos di burico no ta yega shelo.
For di aña pasa nos prome minister a duna lider di RAIZ ordo pa drecha e asunto di Embassy Suite sino nos prome minister mes lo regla e asunto. Nos sa cu minister Arends no a haci nada y nos prome minister a pone man den e asunto te cu a pone e palapanan riba e beach. Nos prome minister si a cumpli cu su palabra y minister Arends a keda keto.
Otro asunto unda nos prome minister ta bolbe pasa minister Arends un fastball ta e planta di purificacion na Bubaliplas. E planta na Bubaliplas ta responsabilidad di DOW y DOW ta cay bow di nos minister president, pero ta minister Arends ta esun cu ta saca cara y no e prome minister. Durante e 3 aña nada a wordo hasi pa remedia e situacion te cu gobierno a haya ta paga un dwangsom paso te dia di awe no a trese ningun solucion.
Awor kier pone e planta di purificacion cay bow di minister di labor, energia y integracion. Nos pober minister Arends tin cu wanta tur critica paso e no tin solucion pa nada y despues cu nan pase pa WEB NV e minister concerni lo no tin nada di bisa mas tampoco. Riba dje kier pone turista paga $35,= pa e planta di purificacion na Bubaliplas cu lo mester bira un NV.
Segun informacion cu nos a haya a lanta un NV caba y RAIZ lo no tin participacion den e empresa nobo di gobierno. Unico cos cu partido RAIZ ta keda cu ne ta holor stinki y lo bai den historia cu no por a trese un solucion pa e planta aki. Riba dje e truck di chupa pos mester bay awor te cu Zeewijk loke lo aumenta e prijs cu 25 florin. Otro medida di e gobierno aki.
MEP ta sigui rebaha RAIZ ora cu luna pasa minister Wever di partido RAIZ a bay Brussel pa firma e acuerdo financiero pa e programa di digitalisacion di Gobierno su “Roadmap to e-Government. Aruba lo ricibi 15.3 miyon euro for di Union Europeo. Nos ta kere cu minister Geoffrey Wever a pone su firma bij het kruisje pero ora e placa drenta den caha di gobierno lo e no tin nada di bisa mas. Segun informacion ya caba gobierno ta organisa un conferencia riba Artificial Intelligence.
Nos por mira cu cada bes e distancia di partido MEP y partido RAIZ ta mas grandi. Nos por corda cu aña cu parlamentario di RAIZ a expresa cu si no introduci logopedie den AZV lo e no coopera cu nada mas y e minister di salubridad a mand’e un carta cu januari 2024 lo pone den AZV. Wel te dia di awe nada.
Luna pasa 16 di februari 2024 parlamentario Raymond no a presenta pa trata e presupuesto Tourism Product Enhancement Fund. Presidente di parlamento tabata debidamente na altura y den manera autoritario a dicidi di yama e reunion toch cu despues a resulta di no tabata tin quorum. Tabata tin intercambio di palabra entre e minister di turismo y e parlamentario pero despues a aproba e presupuesto Tourism Product Enhancement Fund.
Diahuebs dia 21 di maart 2024 e deadline cu partido RAIZ a duna e president di parlamento ta yega pa trata e ley di matrimonio di mesun sexo. E presidente di parlamento a bisa bon cla cu maart ni april 2024 lo yama e reunion, pero kisas na mei 2024. Partido MEP ta sigui menosprecia RAIZ y ta reta partido RAIZ. Laga nos mira cua partido lo bay para duro of lo bira molimoli.
Partido Curpa ta di opinion cu esaki ta un momento di transicion y manera nos a bisa caba cu e gobierno aki ta riba mashin e ta hala rosea. E ora di ranca e plug di e gobierno aki ta yega y lo hala su ultimo rosea. Partido RAIZ su voz no ta yega shelo mas. Dios su tempo ta perfecto y esaki ta tempo di Dios no di politiconan.
Ora e partidonan politico ta kere cu poder ta di nan y bay contra leynan di Dios, nan tempo lo yega. Esaki ta e momento di husticia di Dios pa caba cu e inhusticia di nos gobierno. Partido Curpa e unico alternativa.
