Departamento di Mucha y Hoben a bira un realidad dia prome di october 2022, despues di casi 2 aña trahando intensivamente riba su rapport di formacion. Pa implementa di un manera efectivo y eficiente e Tratadonan Internacional di Derecho di Mucha como tambe Landsverordering (LV) Kinderopvang, gobierno a dicidi pa crea un entidad; Departamento di Mucha y Hoben, esta; DMH.
Departamento di Mucha y Hoben tabata forma parti di e Sociaal Crisis Plan cu a inicia na fin di 2018, bou di mandato di Minister Glenbert Croes y Gabinete Wever Croes I y concretisa bou di mandato di Minister Rocco Tjon y Gabinete Wever Croes II. Sociaal Crisis Plan tabata den cooperacion y colaboracion cu 20 diferente socio riba un total di 31 proyecto, cu e meta principal pa mehora y reenforsa e sistema nacional di proteccion di nos muchanan.
E logo di Departamento di Mucha y Hoben ta sali for di esun di Sociaal Crisis Plan (SCP), specialmente e colonan, cu tin su nificacion y simbolismo pa dun’e contenido y inspiracion nacional. Esaki ta pa keda recorda cada un di nos, kico tabata e origen di un situacion, cu nos como pais Aruba, no kier pa ripiti nunca mas.
For di e cuater mannan cu tabatin den Sociaal Crisis Plan (SCP), a scoge un man, cu lo sigui tene nos mucha/hoben na halto, pa sigui enfatisa e compromiso di tur instancia cu tabata forma parti di e Sociaal Crisis Plan y cu ta simbolisa e union y cooperacion mutuo, pa enfrenta e retonan hunto y asina percura pa brinda nos mucha- y hobennan un miho futuro. A uza e color magenta ros, cu ta representa harmonia, amor, compasion, cooperacion y respet propio.
E escudo di color aqua blauw ta representa e sistema di proteccion nacional pa nos mucha- y hobennan, cu mester ta ekipa cu sabiduria, balansa emocional, intuicion y imaginacion. E aqua blauw tambe ta pa inspira nos profesionalnan y nos comunidad pa ta leal, sincero, confidente, inteligente y cu curashi pa protega y salvaguardia nos mucha- y hobennan, cu ta un grupo vunerabel dentro di nos comunidad.
E mucha/hoben cu man habri y tratando di alcansa e strea geel, cu ta representa nos simbolo nacional riba nos bandera. E strea geel ta simbolisa e compas moral cu nos kier p’e mucha alcansa, cu e guia di esunnan cu ta na su encargo, riba un caminda di bida yena di trankilidad, positivismo, felicidad, prosperidad, speransa y relahacion. Sin laga afo, e detaye principal di e mucha/hoben den e colo blanco, unda su curason y bos ta resalta, pa representa e forma di mas puro di amor, inocencia y paz, cu por existi y cu nan merece di tin riba nos isla, sin ningun tipo di discriminacion!
