Mainta Rey Willem-Alexander, Reina Máxima y Prinses van Oranje, Amalia, a yega Aruba y den un bus nan a bay direccion Oranjestad. Na Wilhelminapark tabatin e ceremonia di bonbini. Aki a tene un encuentro cu Gobernador Alfonso Boekhoudt.
Na Wilhelminapark a tuma luga e acto protocolar, unda cu a toca tanto e himno di Hulanda como esun di Aruba. Despues di e himnonan, Rey Willem-Alexander a inspecciona e erewacht, cu tabata wardando desde trempan yegada di Famia Real. Despues di a termina na Wilhelminapark, nan a cana bin direccion parlamento.
Nan a para dilanti Monumento 18 di Maart, unda Rey Willem-Alexander, Reina Máxima y Prinses Amalia a presencia algun balie dje muchanan. Aki nan a acerca muchanan y duna nan man. A sigui c’un caminata pa parlamento pa un encuentro cu e lidernan di fraccion. Na Plaza Henny Eman tabatin presencia di Leerorkest, cu a deleita Famia Real cu musica.
Prome cu nan a drenta parlamento, e muchanan para na banda por a mira Famia Real di cerca y a saluda nan. Den parlamento nan a reuni cu e lidernan di cada fraccion. Despues e delegacion ta sigui pa Cocolishi, na unda Conseho di Minister ta ubica. Aki lo tin un encuentro cu minister presidente y e ministernan. Na caminda nan tabata saluda pa publico y tambe a topa c’un coro hubenil.
