Departamento di Inmigracion Aruba a ranca sali diamars mainta, 5 di september cu un Opleiding nobo despues di casi 20 aña sin un Opleiding di e nivel aki. Ta trata di un Midden Management Opleiding.
Director di Inmigracion Aruba, Andrew Hoo a splica cu esaki ta parti di e plan integral cu e departamento tabata tin tempo cu a reorganisa Inmigracion Aruba – ora cu a sali for di IASA y bira Inmigracion Aruba.
E tempo ey a bin reorganisacion y tambe pa casualidad e ‘Landspakket’ unda tabata tin e parti di e ‘plan van aanpak: Versterking grenstoezicht’ y den esey tabata hinca e Opleiding. Inmigracion a tuma e oportunidad aki pa hunto cu Koninklijke Marechaussee formula un Midden Management Opleiding pa eleva e nivel di nan personal.
HOPI FACTOR A HUNGA ROL RIBA TARDANSA
A dura basta aña pa por a yega na e punto aki, segun Hoo, y mester remarca tambe ta hopi aña a pasa desde e ultimo Opleiding di nivel pa e personal di Inmigracion Aruba. “Bisando esey, mi kier a bisa danki tambe na e personal cu a mustra hopi pasenshi di nan banda,” sr. Hoo ta expresa.
A dura mas o menos dos aña pa logra yega na e dia aki cu tin e Opleiding cla pa cuminsa.
A puntra sr. Hoo pa kico a tarda asina hopi pa Inmigracion por haya un Opleiding necesario riba e nivel aki, di cual sr. Hoo ta contesta cu ‘ta yen di factor a hunga un rol.’ Tempo cu e departamento aki tabata cay bao di IASA, tabata tin diferente Management Team y diferente hefe cu tabata opera akinan, pero e atencion nunca a wordo enfoca riba un Opleiding. “Mas tanto e atencion tabata pa tin continuidad, pero inversion den Opleiding, pa algun motibo of otro prome cu mi tempo esey nunca tabata un enfoke den e departamento,” segun Hoo.
DIFERENTE PUNTO PA REPASA
Den e parti di Midden Management, lo cuminsa un rato na refresca e memoria pa loke ta e parti di Document Herkenning den documentonan di biahe manera paspoort, visa, y tur loke ta rekeri pa un biahero por sali y drenta Aruba, e personal di e midden kader lo haya esey pa repasa.
Despues lo toca e parti di e Landsverordening Toelating Uitzetting, y tambe e Toelatingsbesluit, lo repasa e basico pa sigui crece riba esey, segun sr. Hoo. Tin mas vak, cu Koninklijke Marechaussee conhuntamente cu e bedrijfsvoerder di Inmigracion a hinca den otro pa sigui e Opleiding, cual lo dura mas o menos un aña.
Sr. Hoo a gradici e personal y Miloushka Henriquez kende a pone hopi esfuerso di su banda pa haci esaki un realidad hunto cu colega di Marechaussee Erwin Bol, hunto cu tur otro colega cu a duna un aporte pa haci esaki un realidad.
