Actualmente e preocupacion mas grandi cu ta reina den pueblo, ademas di e costo di bida sumamente halto na Aruba, t’e recibo astronomico cu hopi hende a haya pa paga pa november. Tur hende ta papia di e suma di e cobransa di coriente, pero riba e recibo mester check e uzo, es decir e cantidad di kwh cu a uza. Esey t’e indicativo di loke mester paga.
Dennis Ecury, ingeniero na Capricorn One NV a indica cu tin un ‘sliding scale’ den uzo di coriente. E importante ta paga pa analisa kico nan uzo tabata den e temporada. Un di e kehonan tabata cu NV Elmar a tuma tres pa cuater dia extra di e meter. Segun Ecury, e pueblo no mester preocupa ya cu e siguiente luna lo cera e luna cu tres pa cuater dia menos.
Mas aleu, Ecury a indica cu door di e temporada extra calor cu Aruba tabatin na september y tambe ainda na october, a pesar di e yobida, esaki ta haci cu e airco ta bay ranca mas coriente door di e calor pafo, pa cual e consumo tambe ta subi. Si pone e aumento di coriente c’un 26%, cu tambe tin su efecto riba e uzo di coriente.
Na NV Elmar tin hopi profesional ta traha y obvio, unda cu tin ser humano ta traha, di mes tin fout cu ta sosode. Pero si tene na cuenta cu awendia mayoria meter di NV Elmar ta smartmeter, e margen di eror ta masha chikito. No tin skirbimento mas manera antes, sino ta scan ta scan. Esey ta pa contesta e pregunta cu si ta pensa cu nan por a comete un eror na N.V. Elmar cu e cobransa a bin asina halto.
Pa loke ta costo di bida na Aruba, hopi t’e kehonan cu ta drenta tur dia, unda cu Ecury como comerciante tambe ta tende cu cosnan na Aruba ta birando impagabel. Ya caba luna di october ta cabando y di awo pa december, no tin niun indicacion di cu prijs di coriente lo baha.
Un usuario cu ta desea pa mira un reduccion riba su recibo di coriente, lo mester inverti y haci tur su aparatonan electronico inverter, haci tur e bombionan pa luz LED. Esey ta haci un diferencia grandi. Den esaki mester corda pa no laga porta di frigidaire habri pornada, no sali cas bay traha den dia sin paga luz, no laga porta di camber habri pa e airco fria henter e cas y tampoco pone e airco na 16 of 17 grado Celcius y drumi bou dos deken, pasobra mas bo ta paga. Por pone e airco na 21, 22 of te hasta 23 grado sin problema y pone den forma automatico, pa asina bo spaar mas coriente posibel.
