Entre diadomingo 8 di augustus y diadomingo 15 di augustus ultimo, den un siman di tempo, Aruba a conta cu no menos di 895 caso positivo di Covid-19 riba nos isla. Pues den shete dia di tempo, casi 900 hende a infecta cu e virus aki. No tin cifra disponibel di cuanto di e hendenan aki tabata vacuna na momento di pega cu e virus.
Dia 8 di augustus tabatain 12455 caso positivo y ayera diadomingo e tabata na 13350 caso. E cantidad di casonan activo tambe a sigui subi, no obstante cu pashentnan ta cura. E cantidad di casonan positivo tur dia ta mas cu e cantidad di pashentnan cu ta cura y sali di isolacion. Den un siman el a subi di 807 caso activo pa 1084 caso. Mester menciona cu e cantidad di mortonan a subi cu 8 den un siman, di 111 caso pa 119 caso.
