Ronaldo Jesus Nortan, ta e ultimo hoben di e grupo cu tabata hunto dia a tira Skie mortalmente, pa presenta den Corte. Pero sigur no a spera cu Ministerio Publico lo a bay pidi un castigo di 14 aña pa e solo hecho cu e tabata chauffeur e anochi di e sucedido. E caso aki a sosode dia 18 di augustus aña pasa. Ski despues di a ricibi e tiro, a move bay otro unda ambulance a buske
Tanto e acusado como su Abogado ta bisa cu e hoben di 18 aña tabata solamente e persona cu tabata maneha e auto den cual e grupo di amigo a bay keiro e anochi di e sucedido. Y cu niun momento a subi e auto e anochi ey pa bay tira un hende mata.
Hues a mustra e acusado riba e diferente declaracionnan cu tin den e PV cu ta bisa cu e persona cu a los e tiro, esta Zachari Quandt na tres ocasion a puntra si e ta tira, y tur, cu excepcion di e hoben Werleman sinta dilanti, a contesta “siiiii”. Esaki ta algo cu Ronaldo ta desmenti.
E propio Zachary a bisa cu e tres amigonan di dje den e auto a instiga pa e tira (menos Werleman). Pero e acusado ta sigui nenga. “Mi no a scucha Zachary bisa esey mes,” el a bisa hues. Den Corte dado momento el a lanta para y a pidi e yiu di Skie disculpa pa loke cu a pasa y cu sigur no tabata su intencion pa e hendenan bay mata su tata.
Tempo cu e hecho aki a tuma luga, e hoben tabatin 18 aña, e tin un bon relacion cu su mayornan y su ruman homber chikito. El a caba su scol y tabata traha como “koelmonteur”.
Profesionalnan a traha rapport riba su personalidad y den esaki a keda indica cu e ta un persona cu ta cambia di animo hoi lihe, un rato e ta contento y despues ta bira tristo. Tambe e ta impulso, ta actua sin pensa. E tin caracteristica rabia y frustracion, cual e ta nenga di ta asina. Loke si e ta admiti ta cu e ta experimenta cu droga. Y cu e no ta persona cu lo por comete e hecho aki atrobe, pasobra el a siña su les cu e mester keda leu di amigonan cu por causa daño na otronan.
Fiscal a repasa diferente declaracion pa demostra cu Ronaldo ta responsabel pa e acusacionnan contra dje, asesinato di Ski y intento di asesinato riba cuatro otro persona cu tabata den e bisindario. Na momento cu el a grita “si”, e ta mes responsabel cu esun cu a los e tiro. E Fiscal ta kere cu den e caso aki ta conta e dicho “Samen uit, samen thuis”. Pa su rol den e caso aki, apesar di tur cos, a pidi un castigo di 14 aña.
Dia 15 di juli awor caba, debi cu Corte ta bay den reces dialuna awo, ta duna sentencia den oranan di mainta.