Directiva di Fundashon Stimami Sterilisami ta anuncia e lansamento di su programa nobo pa sterilisacion pa juli 2019 – juni 2020.
E programa aki a wordo inicia y pa gran parti, financia, door di Bucuti & Tara Beach Resort y ta wordo sostene pa Aruba Tourism Authority y Aruba Tourism Enhancement Fund. Esaki a keda anuncia durante un conferencia di prensa diabierna atardi na Bucuti & Tara Beach Resort door di Ewald Biemans – Presidente Animal Care Clinic
E programa aki a ofrece operacionnan di sterilisacion subsidia completamente of parcialmente na organisacionnan cu ta rescata animal y na doñonan individual di mascota y asina a logra sterilisa aproximadamente 11000 cacho y pushi crioyo durante 2016-2018.
Fundashon Stimami Sterilisami kier logra reduci e poblacion di pushi y cacho door di ofrece subsidio riba
operacionnan di sterilisacion na Aruba. E prijs di e campaña tin un reduccion di mas o menos 50% di e prijs normal di un operacion di sterilisacion. E prijs durante e programa pa opera un cacho muhe ta Awg. 150, cacho macho ta Awg. 85, un pushi muhe ta Awg. 80, pushi macho ta Awg. 35. Inclui den e prijs tambe ta un microchip, e procedura pa coloca e chip y un test simpel di sanger HTC. Mester registra e cacho y pushinan online na: www.stimamisterilisami.com y nan mester tin por lo menos 6 luna bieu pa haci e operacion.
Fundashon Stimami Sterilisami ta traha conhuntamente cu organisacionnan di rescate, tur veterinario y “National Plan” (Problemática Kill cage, ley di cacho y cacho riba caya), introduci pa Dr. Irene Croes y Dr. Dellanire Maduro. “Nos meta ta pa elimina e sufrimento di cacho y pushi y mehora e calidad di bida pa nos residentenan y pa mehora e imagen di nos isla den bista di nos bishitantenan,” a wordo bisa door di Ewald Biemans,
presidente di e directiva di “Fundashon Stimami Sterilisami”. “Bucuti & Tara Beach Resort lo iguala e fondo contribui Florin pa Florin te cu 300,000 pa e aña benidero” “Nos meta ta pa yega por lo menos Awg. 600,00 p’asina por sterilisa 5000 pa 6000 pushi y cacho dentro di un aña y pa continua cu e programa den futuro te dia cu ta necesario,” Biemans a agrega.
Aruba Product Enhancement Fund a bisa di bay contribui cu Afl 125,000, y un sponser anonimo ta contribui cu Afl 100,000 na e programa pa aña 2019. E directiva di Fundashon Stimami Sterilisami: Veterinarionan participando ta: Ewald Biemans – Presidente Animal Care Clinic; Rik van der Berg – Vice Presidente Animal Health Veterinary Hospital;
Emile de Cuba Jr. – Tesorera Contreras Veterinary; Suzanne van Grinsven – Secretaria Veterinary Clinics Aruba; Louella Brezovar – Director at Large; Yesenia Arends – Director at Large. Pa mas informacion, bishita e website www.stimamisterilisami.com.
