Delegashonnan di SER-nan di Aruba, Kòrsou i Sint Maarten di bishita na Komishon di Konseho riba Asuntunan di Estranheronan na Hulanda

Un delegashon di e Konsehonan Sosial-ekonómiko (SER-nan) di Aruba, Kòrsou i Sint Maarten a hasi un bishita di trabou djaluna dia 14 di òktober último na e Komishon di Konseho riba Asuntunan di Estranheronan (Adviescommissie voor Vreemdelingenzaken, ACVZ) na Den Haag, Hulanda. E delegashon tabata konsistí di presidente di SER Sint Maarten sr. Damien Richardson, direktor/sekretario general di SER Aruba sr. Felix Bijlhout, direktor/sekretario general di SER Kòrsou sr. Raul Henriquez i direktor/sekretario general di SER Sint Maarten sr. Gerard Richardson.

Meta prinsipal di e bishita di trabou tabata pa sera konosí mas di aserka ku e trabou di e komishon despues ku e SER-nan a presentá e resultadonan di e simposio riba migrashon (laboral) en konekshon ku desaroyo sosio-ekonómiko ku konhuntamente nan a organisá na komienso di mei e aña aki na Kòrsou. 

E Komishon di Konseho riba Asuntunan di Estranheronan Hulandes ta un órgano di konsulta independiente ku ta duna konseho, pidí i riba inisiativa propio, na gobièrnu i parlamento Hulandes riba derechi di estranheronan i e maneho konserní. E konsehonan di e komishon ta dirigí riba e liñanan grandi e maneho gubernamental enkuanto estranheronan. E komishon ta wak si e maneho ta efisiente i efektivo i si ta nesesario e ta hasi rekomendashonnan pa mehorashon.

Durante e kombersashon ku e eksponentenan di e tres SER-nan tabata tin ku presidente di e komishon ACVZ sr. Koos Richelle, sekretario/direktor sr. Wolf Mannens i e konsehero sra. Sonja Avontuur, a para ketu na loke a bini bon kla dilanti durante e simposio di mei último, esta ku aspektonan relatá na migrashon i estranheronan riba e tres islanan Karibense ta di sumo importansia pa atendé ku nan na un manera diligente pa asina por salbaguardiá durabilidat i sostenebilidat di e sistemanan di seguridat sosial di e islanan wetando desaroyonan manera enbehesimentu i emigrashon.

Konsiderando e echo ku ACVZ ta konsehá legisladó Hulandes riba temanan manera migrashon laboral i di konosementu, migrashon familiar, inklushon/integrashon di estranheronan i migrantenan, e SER-nan di e tres paisnan Karibense di Reino Hulandes a haña relevante pa interkambiá di idea ku e komishon.

E kombersashonnan a terminá ku e akuerdo ku tur kuater pais lo koperá ku otro dor di interkambiá di eksperensia, ekspertisio i konosementu entre nan órganonan di konseho ku lo benefisiá tur esnan enbolbí.