Djamars 21 di òktober 2020, un delegashon di MFK ku a konsisti di Gilmar Pisas, lider politiko di MFK, Sithree van Heydoorn, presidente di MFK i Mr. Drs. Javier Silvania, sekretario di direktiva di MFK a hiba kombersashon ku representante di komunidat Chines na Kòrsou.
Pa partido MFK ta importante pa ser informá kua ta e inkietut nan ku ta biba bou di tur gremio den nos komunidat i pa asina por tin un bista kla di e problemanan ku nan ta enfrentá den nan kaminda pa kontribuí na ekonomia di Kòrsou.
Durante di e reunion aki e representantenan di Chinese Business Association un organisashon ku ta representá e komunidat Chines aki na Kòrsou. Durante di e kombersashon aki e miembronan di direktiva presente a trese vários temanan di preokupashon ku diariamente nan ta enfrentá, manera entre otro atrako, kontrolnan di entidatnan di gobiernu di forma no korekto, pèrmitnan na servisio di imigrashon ku ta tarda, esaki ta djis algun punto di preokupashon ku a bin dilanti.
Frakshon di MFK a tuma bon nota di tur e preokupashonnan aki i lo trata te kaminda ku por pa yuda buska solushon i tambe den MFK su programa di akshon pa periodo di gobernashon 2021 pa 2025 lo tene kuenta ku e puntonan aki. Pa medio di esaki, MFK kier gradisí Chinese Business Association pa e oportunidat brinda na nos organisashon polítiko.
