Den e temponan dificil aki, e problemanan social ta sigui aumenta. Por nota den e informenan policial cu e delitonan ta aumenta den diferente skina di Aruba.
Diamars mainta tempran patruya a bay na un adres na Tanki Leendert pa un caso di robo di dos (2) boter.
Nan ta papia cu e señora di inicial A., kende ta declara cu pa 7.30 el a ricibi yamada di un huurdo di un apartamento, esta señora V. E huurdo a cont’e cu na momento cu el a bay traha koffie a bin descubri cu su stoof no ta traha. El a kere cu ta gas a caba y a bay pafo pa controla un que otro. Aki el a bin constata cu no solamente di dje pero di su bisiña tambe a disparce.
E di dos huurdo a conta cu el a mira e boter di gas rond di 11.30 ainda, ora cu el a yega cas, pero e no a uza e stoof mas.
V a conta e Polisnan cu e mes a uza e stoof dia 19 di october, rond di 10’or di anochi y despues dia 20 di october te rond di 7.30 di anochi. E ora a nota cu e boter di gas a disparce.
Robo vehiculo
Diamars mainta entre 9.15 y 10.45 a horta un quadracer riba parkeerplaats di Caribbean Palm Village Resort na Noord.
Ta trata di un quadracer di marca Yamaha modelo RAPTO 700R aña 2015. E ta cora, blanco y preto. Riba dje e tin sticker pega na banda drecho. Un ta un sticker di BULA colo oranje y uno di Aruba Dushi Tera color blauw. Polisnan a tuma e denuncia.
Destruccion
E mesun dia tambe den oranan di atardi a pidi Polis bay na un cas na Generaal-Majoor de Bruynewijk pa algo cu a sosode den ausencia di doño di cas.
Pa 7.15 el a sali di su cas y a laga e cas intacto atras, cera na yabi. Pa 1.44 di atardi, e alarma di e cas a cuminsa zona cual el a yama su ruman pa bay tira un bista.
Pa 2.30 su ruman a chek tur paden y rond di e cas y a mira cu e bentana di sala parti pazuid ta forsa. Pa 4’or di atardi e mes a yega cas y a constata cu berdad a forsa e bentana, pero no ta sinti falta di nada. Asina mes el a haci denuncia.
