“M’a tende señor Ricardo Croes e siman aki ta critica y cuestiona mi persona cu pa via di mi nos no por a explora e industria di cannabis medicinal”, asina Minister Dangui Oduber a duna di conoce awe merdia den un entrevista na radio Top 95 FM. E mandatario a reacciona riba e declaracionnan tendencioso cu Croes a haci riba dje e siman aki ainda den un conferencia di prensa di partido RED. Ey e parlamentario a insinua di tin pensa di comparti tur e mensahenan di whatsapp cu e tin cu Minister Oduber relaciona cu e tema di cannabis y con e minister a gañ’e durante casi 4 aña largo. RED como tal ta culpa MEP di e hecho cu te dia di awe no por legalisa cannabis medicinal ainda na Aruba.
“Ami no a bay campaña cu cannabis. Ami no a priminti mi votadonan ni e votadonan di MEP of cu mi a hinc’e den e programa di partido. El a priminti su votadonan. Awe cu el a laga su votadonan na caya, el a gaña nan, el a tuma nan haci, awo no bin tira culpa riba mi”, tabata expresion di Minister Dangui Oduber. Mas leu Oduber a corda Croes cu e tabata miembro di parlamento y cu parlamento ta e organo legislativo.
“Como miembro di parlamento, e prome dia cu el a huramenta como miembro di parlamento, e por a presenta e concepto di ley ey di cannabis medicinal pa por cultiva cannabis na Aruba, a debati pa haya aprobacion di mayoria. E prome dia, tres aña y mey a pasa y ningun dia Ricardo Croes no a presenta e cambionan di ley riba e landsverordering verdovende middelen. Ami a present’e, cumpliendo cu nos programa di gobernacion. E ley ta cla, e ley ta na parlamento. Nos a prepara e Bureau Medicinale Cannabis. Gobernador a firma e decreto cu el a bira un departamento. Nos a duna importvergunning cu productonan di cannabis medicinal por wordo importa y uza na Aruba”, asina Minister Dangui Oduber a expresa.
Na final, e titular di salud publico, turismo y deporte a subraya e hecho cu “No bin culpa ami pa bo fracaso. Cu abo a gaña bo votadonan, b’a tuma nan haci y bo no a cumpli cu nan. Pasobra si realmente bo tabatin bo votadonan na pecho, cu bo kier a cumpli cu bo programa di gobernacion, e programa cu b’a bay campaña cu ne, e programa cu b’a haya voto p’e, pasobra e votadonan a vota pa Ricardo Croes pasobra el a bisa nan cu e lo legalisa cannabis. Awo ora b’a drente eyden, bo n’ presenta concepto di ley, bo n’ presenta ningun amienda. Kiermen awe no bin culpa ami”, asina minister Dangui Oduber a finalisa bisando.
